رئيس التحرير يكتب : من التراب وإلى التراب يعود .. تحويل جثث الموتى إلى سماد عضوى
رئيس التحرير يكتب : لماذا تصر الحكومة على استمرار شريف أبو النجا رئيسا لمستشفى 57357 رغم الشواهد العديدة على فساده
اقرأ في العدد الجديد ( عدد يناير ٢٠٢٣ ) من جريدة صوت بلادي
روحه دايمًا حاضره بقلم مراد ناجح عزيز
خطوتــين بهدوء
والتالته لو حبّيـــت ..
أدخل
وماتعملش صوت
خلّي عنيك تطوف المكان
وكإنّك واحد من أهل البيت
جاي من سكّة سفر
وبيقرا الذّكريات
والناس ف الصور ..
هنا مثلًا ..
من شويّه صغيّرين ..
فرحان بلبس العيد
وبشب وأطوَل على كتاف ..
أبويا وضحكته ..
وهي بتتمسّح ف كم جلابيته
علشان يقف الزمن بيها
وتنتصر لوجودها ف دنيته ساعه
اللي ع الكمودينو ده
طربوش قديم بتاع جدّي
لو طوّلت النظر ليه شويّه
اجري قوام اقفل الشبابيك
واشد الستاير
إكمنّها روحه دايمًا حاضره
وبتخاف م الهوي يقلب حال البنات
وتمشي علي كيفها
هنا تمثال جميل لاتنين ..
كانوا صاحب وضل
كانوا قلب وضلوعه ..
اللي قافلين بحب من خوفهم ..
عليه
كانوا واد وبنت ..
قطر الأحلام علي غيرهم فات
وماجاش عليهم دور
فقرروا يكملوا الباقي انتظار
ويستحملوا شوك اللي رايح
واللي جاي , بالعين ..
يقف
ويتأمّل
ويمشي
وده راديو ترانزستور
من وقت ما كان الونس بالناس
وألف ايد تتمد وتسندك
لو مِيلت
ودي صورة أمّي ف شبابها
قبل اللي مايتسمّي يزورها
وتقول : عجّزت
*(وتقول للزمان ارجع يازمان ..)
خطوتــين بهدوء
والتالته لو حبّيـــت
