نقطة تلاقى - شعر صفوت موسى

أدور على نقطه تلاقى

 ما بينا ألاقى المستحيل

 نشوف جذور الشجر

 ضفاير عروسه النيل

وإنتوا تشوفوها

تعابين عذاب وويل

 ونشوف قطرات المطر

 حبات ثمر

نحلم بنهر السلسبيل

وإنتوا تشوفها

رصاص قناص وحجاره من سجيل

نحب الهرم والحرم

وإنتوا تحبوا الكهف والتقتيل

بنهوى الصبح صباحى

وإنتوا غاوينها ضلمه وليل

نصاحب حمام السما جنب النجوم

وإنتوا تصاحبوا العنكبوت والبوم

فى إيدينا غصن زيتون أخضر

وإنتوا فى إيديكوا الشوم

لما نحزن بنمسح دمعنا بمناديل

 وإنتوا لما تحزنوا بتهدوا كل جميل

ولما نفرح بنرقص قلب وجسد

على غنا ومواويل

وإنتوا لما تفرحوا تاكلوا قلوب البشر

وتنكلوا تنكيل

إحنا غابات الشجر

وإنتوا فرع مايل أصفر هزيل

 وأدور على نقطه تلاقى ما بينا

 ألاقى المستحيل