راجي بشاي يكتب : ‪ البريكس و حدوتة الدولار‬‬

هي إيه حكاية بريكس دى ؟ فنجان قهوتك الأول وتعالى ندردش شوية:
*اول اجتماع ل " برك BRC" كان سنة ١٩٩٨ في مقاطعة ابينسك في روسيا .. في مكان كان اسمه المطبخ الاحمر .... كان قاعة اجتماعات سرية ايام السوفييت و بعد التفكيك بقى مطعم.
* ايه هي برك .. الحلف البرازيلي الروسي الصيني " اللي الروس السوفييت اعتبروه حامي الفكر الشيوعي " و الاجتماع ده كان في ٦ ديسمبر ١٩٩٨ و كان هدفه تأسيس كيان يحمي الدول الثلاثة من توحش الغرب بعد تفكيك القوة اللي كانت بتهدده اللى هى الإتحاد السوفيتى السابق.
* اللي حضر الاجتماع ده غير بعض قادة المخابرات الروسية فلاديمير بوتين بصفته رئيس وزراء روسيا.و معاه يفكيني بريماكوف كان رئيس وزراء روسيا برضو .. و بريماكوف هو احد الداعمين ل بوتين من ايام ما كان عميل استخباراتي في ألمانيا و فضل داعم له لحد ما مات في ٢٠١٥.
* و كان بيحضر هاو چينتاو رئيس الصين من سنة ٢٠٠٣ ل ٢٠١٣ .. وقتها كان نائب الرئيس جيانج زيمين .. و امين عام الحزب الشيوعي الصيني
*و كان حاضر لولا دا سيلفا بصفته رئيس حزب العمال البرازيلى و مرشح رئاسي كذا مرة وكان بيدعمه الرئيس وقتها فيرناندو انريك كاردوسو .. و ده كان استاذ علوم سياسية في جامعة سان باولو ... راجل محترم و ملوش في العوق اللي بيحصل في العالم وقتها و كان عنده طموح للبرازيل لكنه عاجز عن تنفيذه بسبب الضغط الامريكي.
* الثلاثة دول حطوا تصور للكيان اللي عايزين يعملوه ... و كان حلمهم كيان اقتصادي كبير يوازي الكيان الامريكي و خططه المستقبلية و عشان تعمل شئ يواجه الكيان ده كان لازم تجيب حد يكون فاهمها
* قدر بوتين يستقطب اكبر الخبراء الاقتصاديين في مجموعة جولدمان ساكس اللي هو بروفيسور چيم أويل .. مقالوش تعالي إحكيلنا الاسرار .. كان دور چيم اويل هو شرح الخطط الرأسمالية و دراستها من فريق اقتصادي تم اختياره بعناية من بوتين و جينتاو
* و في المقابل كان " أويل " بيحصل علي مكافآت مالية كبيرة بتتحول لحساب تم فتحه له في بنك VTB الروسي فرع فرانكفورت ألمانيا و في ١٩ مارس ٢٠٢٢ قامت الحكومة الألمانية بتصفية البنك ده لأنها اكتشفت ان كل الجواسيس الألمان حساباتهم فيه " بوتين الشرير"
* في ٢٠٠١ الهند طلبت انها تدخل ناس من عندها في الورشة التعليمية دي ... و ده كان بدعم من روسيا وتم اول اجتماع ل " بريك BRIC " .. جيم اويل وقتها قال احذروا ال ٤ إقتصادات دي عشان هتنمو بشكل كبير
* في ٢٠٠٨ تم انشاء الكيان الاقتصادي بريك ل دول عايزة بس تتاجر مع بعضها و تساعد بعض و خلاص
* في ٢٠٠٩ جنوب افريقيا انضمت بعد كفاح ٥ سنين بتحاول تساوي ملفاتها
زي مثلا الناتج المحلي اللي مكنش بيتعمل بيه مشروعات قومية .. و الفساد .. و بعض الوزراء كانوا مجرد عملا لبريطانيا ومن الشروط اللي علي أساسها تم قبول و ضم جنوب افريقيا ان الدولة المنضمة يكون عندها قاعدة عملاء و مستثمرين قوية و مشروعات في البنية التحتية و ده ملف إشتغلت عليه جنوب افريقيا
* نيجي لنقطة مهمة : ايه معايير اختيار دول بريكس BRICS؟
١- ان يكون عندها مشروعات قومية
٢- موقعها الجغرافي متميز
٣- مستقلة سياسياً
٤- الناتج القومي فيها بيتوجه لمشروعات بنية تحتية
٥- مستقرة عسكرياً
٦- مواقفها على الساحة الدولية
* عشان كده دول زي السودان و فلسطين و من يشابههم يستحيل قبول عضويتهم في يريكس .. دي دول لا فيها تصدير و لا إنتاج و لا طاقة و لا حتي عارفين يستفادوا من ثرواتهم .. احنا مش في عصر طبطبة علي حد خلاص .. اللي هيقع هينداس عليه صدقوني .. و المشرحة مش ناقصة قُتَلة!!
* الجملة المتخلفة بتاعة (هو ايه أهمية بريكس؟) .. هو يعني انت كنت حاسس بأي نشاط ل بريكس قبل كده ... ده انت مسمعتش عنها الا بعد حرب اوكرانيا
** أي كيان اقتصادي اهميته بتنبع من حجم استحواذه علي التبادل التجاري و الاقتصاد .. ف لما كيان يكون مستحوذ علي ٣٢ % من حجم تجارة العالم .. و يجي بوتين يقول في آخر إجنماع احنا استحوذنا علي ٤٢ %
** الزيادة ال ١٠ % دي منين .. روسيا و الهند قدروا يرفعوا تجارة الغاز بينهم بنسبة ٦٨ % اللي الهند بتاخده تبيعه لاوروبا ب ٤ اضعاف سعر بيع روسيا لهم فقدرت تزود الناتج القومي بتاعها بنسبة ٢٦ %
♦ لما تعرف ان ألمانيا بتصفي مصانع الاسمدة عندها بسبب العقوبات الروسية .. و ان من بداية ٢٠٢٣ لحد النهاردة ٧ مصانع أعلنوا افلاسهم و ان المانيا بتنقل بالفعل مصنع اسمدة حكومي في المنطقة الاقتصادية في مصر هربا من الاغلاق
و ان روسيا بعد القمة الافريقية الاخيرة قررت انشاء ١٠ مصانع اسمدة في دول مختلفة افريقية منها ٣ في مصر و واحد في جنوب افريقيا و مرشح إن الجزائر هيكون عندها مصنع .. و كل ده داخل بريكس .. يبقى كون انك مش فاهم أهمية الكيان دي مشكلتك لوحدك!!
** و كمان جملة "هو انت حسيت باي فرق بعد دخولك بنك التنمية" .. ده اعتراف منك إنك من كوكب موازي
* انت بعد ما دخلت بنك التنمية قدرت تدفع بالجنيه مقابل القمح الروسي في شحنة مايو اللي فات .. و كذلك الزيت و الذرة
* زي ما دفعت للهند روبية .. بقى لزاماً علي الهند تقبل منك جنيه ????
* اصدرت سندات اليوان و انت مش خايف لأن في اسوأ الظروف هتبيعها للبنك و تسيلها منه لأنه بالفعل بيصدر سندات بيها
و قررت إصدار سندات بالراند الجنوب افريقي .. و بعدها الريال البرازيلي
* انت سددت تمن الفراخ البرازيلي بعملات محلية مش دولار
كل ده نتيجته انك ك اقتصاد مصري قدرت تتخلي عن الدولار بنسبة ٤٠% من معاملاتك في ٨ شهور .. تخيل لو انت لسه بتدفع بالدولار كان زمان وضعك ايه دلوقت !!
** وجود بريكس هو اللي سمح ل روسيا انها تبيع الغاز و النفط بتوعها في العقوبات .. و بعد فصلها عن نظام سويفت و وجود نظام دفع تاني داخل بنك التنمية و نظام مير و ده اللي خلاك تقدر ك مصر تستورد النفط التقيل عن طريق ميناء السخنة و تبيعه للسعودية .. " السعودية بتدفعلك دولار .. و انت بتدفع ل روسيا روبل و إنت بتشتري من روسيا بالسعر التفاضلي و بتبيع للسعودية بسعر البورصة " .. ده مكسب أهو من ورا بريكس
** الطفرة التكنولوجية اللي حصلت في الهند كانت بدعم من بريكس
والعالم كله ميقدرش ينكرها و انهاردة مودي بيقولك لازم نتعاون ك بريكس في مجال الفضاء ... هيتعاون بناءا علي ايه .. علي خبرة روسيا في المجال ده
طب لو انت بريكساوي .. هينوبك من الحب جانب.
*تعالي بقى اكلمك عن إلانفرادات اللي بجد : فنجان قهوتك الثاني بقى و يلا بينا
♦في ١٩٩٧ الصين قررت انها تعمل مشروع الحزام و الطريق و اللالئ المضيئة .. قعد زيمين يخطط للمشروع ده و بعده هاو جينتاو لحين ما دخلت حيز التنفيذ في ٢٠١٣
♦ في ديسمبر ٢٠٢٢ مصر دخلت رسميا في المشروع ده
بس مصر بقى لما تدخل مشروع بتكون دور فاعل فيه .. مش ديكور وبس
♦ مصر هتشارك في الحزام و الطريق عن طريق قناة السويس و المنطقة الاقتصادية لقناة السويس و اللي في ١٩ ديسمبر ٢٠٢٢ انضمت لمنظمة المناطق الإقتصادية الافريقية
♦ في يونيو ٢٠٢٣ الرئيس السيسي عمل جولة افريقية لدول مبنسمعوش عنها إلا في كاس الامم الافريقية بس .. زامبيا و أنجولا و موزمبيق
" ركز يا صاحبى الله لا يسيئك في كل معلومة عشان هنحتاج كل كلمة .. طبعاً الإعلام مخدش باله أساسا وقتها
♦ من كام يوم الحكومة أعلنت عن الخطين الملاحيين اللي هيربطوا افريقيا بمصر .. هات بقا كل القطع دي و تعالي نفرد الخطين:
**خط هيضم دول شرق افريقيا اللي هي دول الكوميسا و عددهم ٢١ دولة .. يا باشا بقالنا في الكوميسا دي عشروميت سنة بنسمع عنها ... استفدت منها عود قصب نعمله شوب عصير و للا حتى كوز ذرة ..... ابداً ..كيان ملوش أي ثلاثين لازمة
**الخط التاني : رايح دول غرب و جنوب افريقيا
* دول افريقيا يا عزيزي بتنقسم لدول غنية بالثروات جدااا .. و دول محيلتهاش اللضا لكن يمكن الاستثمار فيها و عدد سكان افريقيا مليار و نصف مليار نسمة
♦♦ فيها دول غنية بالدهب : مالي و غانا و جنوب افريقيا و السودان و تشاد و النيجر و بوركينا فاسو " شوف الصدفة يا عزيزي ٥ دول منهم كانت تحت سيطرة فرنسا.. اما فرنسا دي عليها حااااجااااات "
♦♦ وفيها حاجة اسمها ال ١٠ الكبار بترول و هم بالترتيب : نيجيريا .. انجولا .. الجزائر .. ليبيا .. مصر .. الكونجو .. الجابون .. غانا .. غينيا ثم تشاد
♦♦ الغاز : العشرة الكبار أيضاً بالترتيب: الجزائر .. مصر .. نيجيريا .. ليبيا .. غينيا .. موزمبيق .. كوت دي ايفوار .. تونس .. الكونجو .. جنوب افريقيا ثم تنزانيا.
♦♦ اليورانيوم : يكفى إنى أقولك إن ناميبيا ثالث دولة عالمياً في انتاج اليورانيوم و النيجر و جنوب افريقيا و مالاوي من أكثر دول العالم إنتاجاً لليورانيوم .. " يا خويا اومال اليورانيوم ده بيروح فين" .. ده الدول دي ضلمة بسبب نقص الكهربا .. يكونش الغرب الكيوت المؤدب الإنساني الأخلاقي ابو شعر مسبسب بيسرقه منهم عشان يتقدم و يزدهر و سايب الشعوب دي تموت "
♦♦ الانهار بقى في افريقيا : من أول نهر النيل اللى بيمر ب ١١ دولة .. نهر الكونجو .. نهر النيجر .. نهر زمبيزي .. نهر السنغال .. نهر كوينكي .. ثم نهر أورانج أقلهم اللى بيمر فقط ب ٣ دول.
♦♦ في قارات العالم كلها مفيش العدد ده من الأنهار اللي حواليها أراضي خصبة و منابع نهرية علي ٤٥ دولة .. شيل الحدود المشتركة يبقى ٤٠ دولة
من اصل ٥٥ دولة هي دول القارة ... و عندنا مجاعة و ثلث سكان القارة بيموتوا من الجوع!
♦♦ انا ليه بقولك الكلام ده هي مش حصة جغرافيا .. دى معلومات تم استخدامها بالفعل.. اتفاقية الحزام و الطريق هتقسم الدول اللي فيها ل دول منتجة و دول سوق يستوعب حجم الانتاج ده و تقدم مقابل المنتجات دي ثروات .. يعني بدل ما هي بتتسرق و بتجوع ... هيتاخد منها ثرواتها مقابل احتياجتها اللي هتحافظ علي حياة شعبها
♦♦ وده الدور اللي هتلعبه مصر .. الكوميسا و ال ION و غيره و غيره .. كله هيتلغي و يتعمل اتفاقات جديدة
* أنجولا عندها بترول بالهبل و عندها مصيبة في الاقتصاد و مجاعة
لدرجة ان في نظرية طلعت اسمها معضلة انجولا
* موزمبيق عندها ٥،٦ مليار مكعب غاز بتحرق منهم ٤،٢ مليار عشان مش عارفة تشغلهم ???? .. هات يا بني ده كله و أنا أشغلهولك و أدخلك سوق كبير عندي في المنطقة الإقتصادية و أديلك إحتياجاتك.
* زامبيا ٦٧% من اراضيها قابلة للزراعة و مش مزروعة عشام لا عندها فلوس للاسمدة و لا لتكنولوجيا الزراعة و لا معدات و فيها مجاعة .. بس مصر هتبقى مركز توزيع الاسمدة الروسية و تعهدت روسيا بنقل تكنولوجيا الزراعة لأفريقيا.. و الصين بتعمل مصنع معدات زراعية في شرق القناة .. ف تعالي أزرع عندك و احل لك مشكلة المجاعة و الانهيار الاقتصادي و أرفع الامن الغذائي عندي
و كده كده العالم دخل مرحلة الشح المائي و الاستثمار في الماء داخل افضل عصوره .... و بدل ما أوروبا تسرق الميه الافريقية .. الكتلة الشرقية تفيد و تستفيد عن طريق مصر في السلع
♦ عرفت ليه الريس راح ال ٣ زيارات دي؟ عرفت الريس راح دول سكانها بتموت من الجوع و الملاريا ليه؟
♦ السؤال: إيه اللي هيجبر الدول ال ٣ دول انها تسمع كلامك؟ و الإجابة: الديون .. ال ٣ دول دي من اكبر ١٠ دول مديونة للبنك الدولي و معندهاش فلوس تسد .. أوم تيجى الصين هتشتري ديونها و تسددها من ال ٣ تريليون دولار اللي عندها
* اللي محير الإخوة المحللين .. هو الدولار هينهار؟ طب الصين هتعمل ايه بالاحتياطي؟! لا طبعاً .. الصين لا يمكن توافق علي انهيار الدولار عشان الاحتياطي .. الإحتياطي ده الصين هتشتري بيه اللآلئ المضيئة
زي جمهورية سيشل و موريشيوس في أفريقيا و اللي في ٢٠٢٤ هيعلنوا إفلاسهم هما الاثنين .. مش بس كده .. و هتنقذ بيه رواندا و تنزانيا و تدخلهم الحزام و الطريق.. و هتشتري ديون جيبوتي و تعملها لؤلؤة في اللالئ المضيئة برضو
**يبقى هنا فهمت يا صاحبى دور مصر ايه وعرفت مين هيمول الخطين الملاحيين دول أيها الخبير اللى ملكش فيها و عمال بتتريق و هارى المواقع بوستات تقول إنه هيقترض تاني و يورطنا
* ندخل بقا على موضوع هيمنة الدولار : و اللي بيقولك هتاخد من ٥ ل ١٠ سنوات عشان يبقى فيه عملات عالمية للتداول غير الدولار!! ومعرفش هم جابوا التأكيد ده منين! .... الحقيقة الثقة دى هتاخدكم لحافة الهاوية في الاخر
* في يونيو اللي فات وتحديدا يوم ٢٩ .. الفيدرالي المركزي طلع تقريره ان في خلال ال ١٥ شهر الماضية تم تقليص حجم التداول بالدولار عالميا
من ٩١،٣ % الي ٥٦ % .. يعني حصل انخفاض بنسبة ٣٥،٣ % في ١٥ شهر

* لو ستخدمنا مبدأ القياس .. يبقى في ديسمبر ٢٠٢٥ هيصبح حجم التداول من ٢٠ إلى ٢٧ % عالميا
* طب ايه اللي بيعطي الدولار قوته :
١- البترودولار اللي بيتفك حالياً سواء سعودية او إمارات او دول افريقيا
٢- الصادرات الامريكية اللي في الربع الاول من ٢٠٢٣ تقلصت بنسبة ٤٢،٦ %
٣- التسليح الامريكي واللي الكونجرس بيلطم بسبب تدمير موازنة التسليح علي ايد الحاج بايدن
٤- البنك الدولي و صندوق النقد الدولي اللي معتمد عليه واللي بوتين قال انهم هيبقوا ذكري جميلة للعاشقين و الصين هتديلهم بالباقي لبان
* الدولار لن يستمر العملية الدولية الوحيدة فى التعامل التجارى لأن ٤ مليار مواطن من سكان الكوكب قرروا يتخلوا عنه .. الشلوت اللي أخده الجنيه الاسترليني اخف كتير من شلوت الدولار و إن كان الاسترليني عملة أكبر قوة إستعمارية علي وجه الارض تم ازاحته في ٤ سنين وكانت دولة واحدة اللي بتزيحه .. يبقى تكاتف ٢٥ دولة (١١ منها فعلى) و الباقى تابع مراعاة لمصالحه مش ميقدرش علي عملة و بالذات بعد ما أعلن بوتين عن إحتمالية إقرار عملة موحدة لأعضاء البريكس!!
* بس لو انتوا مفكرين ان امريكا هتسيبنا في حالنا تبقوا غلطانين .. أكيد سمعتوا عن مشروع الشام الجديد و طبعاً السوداني رئيس وزراء العراق من يوم ما جه .. و هو هيضيع اللي باقي من العراق
* امريكا رجعت نشرت ١٥٠٠ جندي امريكي في العراق .. لا هما عشان ايران و لا عشان سوريا .. أمريكا بتخطط لتعطيل مشروع الربط الكهربي .. لأنه لو اتنفذ العراق هتبقا محتاجة لنفطها و غازها و ده متضارب مع مصالحها.. لو السوداني ده كان وطنى بحق كان رفض انزال الجنود.
* بشار الأسد حس ان الخريطة الجديدة دوره فيها صغير و لا يري بالعين المجردة ... بدأ يرازي الأردن و الأردن صابرة عليه .. إوعي تفكر ان أي دوشة في الأردن مش هتضرك في مصر .. نووو .. الإردن دي هي ذراعك في الشام
** يا حبيبى إنت لما أممت قناة السويس .. إنجلترا و فرنسا إنتفضوا يحابوك و امريكا بعتت طيران لحليفتها اسرائيل عشان تقصف ولادك
و هي مجرد ممر ملاحي
* إنت اانهاردة بتشارك في إزاحة الغول عن عرشه .. منتظر يطبطبوا عليك .. اجمدوا كده عشان اللي فات حمادة و اللي جي حمادة تاني خاااالص و خاصة بعد ما أعلن رئيس الصين عن إحتمالية إقرار الدفاع العسكري المشترك بعد قمة البريكس رقم ١٥ في " جوهانسبرج " .. و ده الاجتماع التاريخي للمنطمة اللى ليقترحوا تسميتها " بريكس ١١ " بعد انضمام ٦ دول جديدة (مصر .. السعودية .. الإمارات .. إيران .. أثيوبيا و الأرجنتين) وفي انتظار القمة العام القادم أكثر من ٢٠ دولة حتى الآن
* قبل ما نختم فيه سؤالين ع الطاير .. فنجان قهوة ثالث صغير  و نسأل و نجاوب مع بعض:
و اما حد يقولك اناظرك في الاقتصاد متنزلش نفسك ليه ... قوله هبعتلك راجل من رجالتي و ابعتني انا و انا اقلعوهلك يا غالي ..... بس تكون في دار من دور القوات المسلحة و يفضل المدفعية بتفاءل بيها
وتحيا مصر الصابرة بلادي .. الحرة بلادي حلوة الحلوات
* السؤال الأول: ليه اثيوبيا انضمت للبريكس؟
الجواب: تخطيط مصري روسي اماراتى صينى - عشان تخرج من العباءه الأمريكيه التى بتخطط لحصار مصر من الجنوب وتحاصرها بمشكلة المياه و سد النهضة .. كلنا عارفين إن الإتحاد الافريقي بلا انياب لكن البريكس له أنياب زرق .. الصين وروسيا طردوا امريكا من غرب افريقيا و دلوقتى بيطردوها من شرق افريقيا أما شمال افريقيا مصر و في الطريق الجزائر و ليبيا و فى الجنوب - جنوب افريقيا و بالمناسبة الشعب النيجيري كمان رفع الأعلام الروسية
* السؤال الثانى: طب ليه انضمت ايران؟
الجواب: عشان يسيطروا على البترول ضموا السعوديه والامارات وايران و عشان يسيطروا على الغاز روسيا ومصر وايران
* لما حد يقولك أى معلومة تانية عن البريكس .. متناكفش معاه ... قوله هبعتلك حد من حبايبى و إبعتني أنا و أنا أضبطهولك يا غالي ..... بس تكون في دار من دور القوات المسلحة و يفضل المدفعية بتفاءل بيها
وتحيا مصر الحلوة بلادي .. الحرة بلادي حلوة الحلوات