راجي بشاي يكتب : لماذا السودان و لماذا الآن

 

* واحدة واحدة كدة .. و نركز مع بعض فى اللى مكتوب .. لأن الموضوع فعلا مش سهل ... واقتناعك أو عدم اقتناعك مش هيغيير من الواقع شيئ ... وكونك تصدق أو ماتصدقش اللى بتشوفه بعينك واللى بتحاول وسائل التشتيت تخليك ماتشوفهوش .. ده مش هيغير الصورة الحقيقية للمشهد القادم !

* لما سمعنا عن النظام العالمى الجديد .. وإن التغيير قادم قادم .. وان مصر بتسابق الزمن وبتستعد بكل قوة لــ لحظة الانفجار وتداعيات التغيير .. ناس كتير قالوا دي مبالغة .. و تطبيل .. و .. و ... لكن مع كل يوم وشهر وسنة بــ يمروا ، كانت الناس بتفهم وتستوعب .. واللى فضل رافض فهو فضل كدة لأنه هو اللى كان عايز كدة.

* الأحداث بتتسارع .. والصدام الاقتصادى بدأ .. المشهد عامل زى اتنين مصارعين كل واحد ماسك فى زمارة رقبة التانى وكل واحد بــ يراهن على ان التانى يستسلم الأول ... مهما كانت الضغوط .. أو الضحايا من دول أو شعوب ... أو ملايين الأبرياء و اللى بيحصل فى السودان جزء من الموضوع ... يعنى جزء من الصورة فقط وليس الصورة الكلية..

* طب هل مصر مستهدفة !!؟ أااه ... مستهدفة ..وبشدة كمان ...لكن الموضوع رايح لأبعد من مصر .. بس يمكن مصر فى بؤرة الضوء ، وفى قلب الإستهداف .. وهيتم التركيز عليها بشدة فى الفترة الجاية .. لأن مصر بجيشها واهميتها السياسية والجغرافية .. هى حجر العثرة الفعلى والرئيسى أمام تنفيذ المخطط القادم ...

* وخلى بالك ... إدراكك ...وعيك ...إيمانك ببلدك ..

هم الهدف فى المرحلة القادمة .. يعنى انت المستهدف الأول .. انت بوابة العبور ... ليه ؟!!! عشان الغرب بشكل عام وأوروبا بشكل خاص .. وشبكات المصالح اللى مدوراهم من خلف الستار .. أصبحوا على يقين إنهم فعليا بدون موارد حقيقية ... الشهور الماضية أثبتت ده .. الأزمة اللى هم فيها النهاردة بتقول كدة ... وأكدت الحقيقة اللى هم كانوا عارفينها .. بس كانوا بيتغافلوا عنها ... تعالي نعد مع بعض: 

١- اوربا قاره فقيره عجوز أغلبها لاتزرع وتستورد غذائها و ما تبقي أصبح صراعا للحرب "روسيا و أوكرانيا"

٢- بعد ان هددت روسيا باللغاء اتفاقيه الحبوب وانها سترسل الحبوب الى مصر لتوزعها على الغلابه في افريقياا

٣- هاجت اوربا لئلا تجوع ووجدت الحل في السودان - والحل تسقط الجيش السودانى

٤- وفي نفس الوقت الدولار ينهار وامريكا محتاجه دهب السودان

٥- روسيا اعلنت عن تفعيل اتفاقيه الدفاع والتسليح مع الجيش السودانى

٦- حامله الطائرات الادميرال كوزنستوف تتجه للبحر الاحمر 

٧- الصين اعلنت انسحاب اعمالها من اثيوبيا بالكامل وحامله الطائرات تايب 003 تتجه للبحر الاحمر

* تصاعد نغمة التخلى عن الدولار فى العالم .. وبدء إجراءات التخلى عنه بالفعل .. وتسارع وتيرة الإجراءات دى .. عامل صدمة كبيرة لحكومة الشيطان اللى بتحكم العالم ... لأن حتة الورقة دى هى بالفعل مصدر قوتهم فى مواجهة الدول أصحاب الموارد سواء غاز أو بترول أو قمح أو ذهب أو يورانيوم أو حتى مياه ... الخ .. الخ .....

* المطلوب دلوقتى الصراع يشتعل للسيطرة على أكبر قدر من الموارد دى تحسباً واستعداداً للحظة سقوط الورقة الخضراء ..و أكيد سمعتم عن آخر الخطوات و هي رفع سقف الدين و حسبما قال ديسانتس المرشح الجمهوري و حاكم فلوريدا : "قبل هذه الصفقة... كانت بلادنا تتجه نحو الإفلاس. وحتى بعد هذه الصفقة، لا تزال تتجه نحو الإفلاس". و أن مبلغ 4 تريليونات [دولار] من الزيادات يعد حجمًا هائلًا من الإنفاق .. يعني بالبلدي إطبع علي المكشوف من غير غطاء دهب!!.

* وطبعا مافيش مكان اغنى بالموارد الطبيعية من القارة الأفريقية .. القارة اللى الصراع داير عليها بقاله سنين ... لكن مش بشكل سافر... 

يعنى شوية بالطرق الشرعية عن طريق امتلاك مناطق نفوذ سواء كان بالاتفاقيات الاقتصادية أو بضخ الاستثمارات ... وشوية بالطرق الغير شرعية عن طريق الابتزاز السياسى او بالسيطرة العسكرية أو باستخدام سلاح المليشيات وجماعات التأسلم السياسى و جماعات الإخوان الإرهابية !!.

* دول القارة الأفريقية كلها فى الحقيقة مش دول .. ولكن مع الأسف أشباه دول ... مجرد انظمة هشة بتحكم مجموعة من العرقيات والجماعات والمليشيات اللى كلمة توديهم وكلمة تجيبهم .. وممكن استخدامهم فى اى وقت لتفجير الاوضاع فى الدولة المستهدفة ... والسلطة المركزية للدولة بــ تبقى سيطرتها دايما فى حدود العاصمة وضواحيها .. وقد تمتد لبعض المدن الأخرى التى قد لاتتجاوز نصف عدد اصابع اليد الواحدة !!.

* والدول المتماسكة اللى خارج نطاق الوصف السابق ، تم استهدافهم ، إما اقتصاديا .. أو من خلال مؤامرة الخريف العبرى (الربيع العربي فى 2011) .. واللى نجا منهم ، يا إما يفضل تحت الاستهداف، او يتحط تحت الباط ويسمع الكلام .... واخدلى بالك إنت و للا لسه عامل فيها من بنها !!.

* اللى بيحصل فى السودان مجرد البداية ... لأن المطلوب تفجير الاوضاع على نطاق واسع .. وتطبيق نموذج الفوضى الخلاقة فى عموم القارة الأفريقية كلها علشان يسهل السيطرة على مناطق النفوذ المليئة بالثروات .. بدل المحاورات والشد والجذب .. لأنه خلاص ماعادش فى وقت ... يعنى من الأخر .. ضربة مِرزبة ولا مليون شاكوش ... .

* واللى بيحصل فى السودان مجرد نموذج وبيان و تجربة أولي .. يعنى لو نجحت وجابت نتايج .. هــ يتم اطلاق شرارته فى عموم القارة بالكامل ... إلا لو كان القائمين على بعض الأنظمة فى أفريقيا عليهم سيديهات (من بتوع ضاضا) ... وساعتها كل طرف دولى وقوة السي-دى اللى فى إيده !!!.

* ولاحظ إن معظم بؤر الصراع وفتيل الأزمات فى منطقة الشرق الأوسط بتنتهى واحدة واحدة .. يعنى السعودية وايران .. السعودية وتركيا .. الإمارات وايران .. مصر وتركيا .. الخليج وسوريا .. الخ الخ .. وكل ده بيحصل خارج العبائة الاميريكية ... يعنى الغرب بيخسر موارد ونفوذ .. وبالتالى كان لازم يتم إشعال بؤر صراع جديدة فى العالم .. وبالذات فى مناطق غنية بالموارد !!!.

* ولاحظ كمان ان سيناريو الفوضى من حرق أقسام وفتح سجون ومهاجمة الوحدات العسكرية والمطارات والقتل العشوائى وترهيب وترويع الآمنين اللى حصل فى مهزلة الهباب العربى ، هو بالضبط اللى نفذته مليشيات الدعم السريع فى السودان .. و ده مش تفكير حمديتى راعى الجمال .. التشادي الأصل البصمجي .. لكن ده سيناريو وحوار واخراج المخرج المسئول عن نشر سيناريو الفوضى !!  .

**؛وصلت ... !؟ طب معنى كدة ان مصر بعيدة عن الموضوع ده !!؟ ميين !!؟؟ 

أؤمر حضرتك ... مصر مين اللى بعيدة !! ده انت فى قلب المعمعمة يا معلم !! إزاي لا مؤاخذة ؟!!.

- انت الدولة اللى افشلت الهباب العربى ..

- انت الدولة الوحيدة اللى نجت من مصيدة إخوان الشر ..

- انت الدولة الوحيدة اللى وقفت وصمدت قدام موجات الإرهاب الدولى ..

- انت الدولة اللى قلبت نظام تحالفات المنطقة ومديت ايدك كمان لتحالفات خارجية اقليمية ودولية.

- انت الدولة اللى حاولت تلم المتبعتر من الإتحاد الافريقى وبدأت تمد جسور سياسية واقتصادية واستراتيجية مع دول الإتحاد .. وبتحاول تعمل ربط لوجيستى بينك وبين كل الدول الافريقية فى حدود المتاح طبعا.

- انت الدولة اللى فى ايدها جزء من محبس الغاز اللى ممكن يغذى أوروبا .. وفى ايدك محبس الهجرة الغير شرعية اللى بتحمى بيه أوروبا دلوقتى !

- والأهم .. إنت الظهير العسكرى اللى مقوى قلب الخليج وعامل التوازن بين قراراتهم بالتنسيق مع المعسكر الشرقى ، وبينك .. يعنى زى ماقولنا .. مصر حجر العثرة اللى لازم يتم تحييده أو لا قدر الله (هدمه) !!.

* بص على الخريطة كويس .. وشوف انت محاط بإييه ..

فى الشرق العراق وسوريا ولبنان ثم الاردن اللى يادوب ماسك نفسه .. وطبعا بالاضافة لنظام معادى اسمه دولة الكيان ... وفى الغرب ليبيا وتونس .. ثم الجزائر اللى ربنا يعينهم على التحديات اللى عندهم .. وفى الشمال تحديات غاز المتوسط وصراعات الحفاظ على مقدراتك فى مواجهة الاطماع العثمانلية .. وفى مدخل باب المندب المؤدى لقناة السويس عندك اليمن .. وفى الجنوب عندك نظام معادى تانى فى أثيوبيا بيتم تحريكه ضد مصر بإشارة إصبع .. ودلوقتى بــ يتم تدمير السودان واسقاطها فى فخ الفوضى والتقسيم والحرب الأهلية..

* انت بتتحاصر يابرنس ... سياسيا واقتصاديا ... مطلوب اسقاطك (إن أمكن) .. و إن كان ذلك غير متاح حاليا .. فما هو المطلوب؟! ...

-- مطلوب انهاكك وتحييدك تماما ..

-- مطلوب انك تفضل تكافح فقط علشان تقدر تفضل واقف على حيلك ..

-- مطلوب إن قوتك كلها تتوجه للحفاظ على نفسك من السقوط ..

-- مطلوب تنشغل طول الوقت بمشاكلك الداخلية ..

-- مطلوب يبقى فيه غليان داخلى عندك بشكل مستمر ..

-- مطلوب جيشك ينشغل طول الوقت بالكاد فى تأمين حدوده وبس .. من كل الإتجاهات ..

-- مطلوب اجهزتك الأمنية تعانى من الضغط المستمر عليها ويبقى أقصى طموحاتها إنها تصد السهام الموجهة للدولة مش أكثر

-- هااااااااااام جداً: و طبعاً مطلوب تغييب وعي الشعب بشكل تام .. و ده بــ يتم عن طريق قنوات ومنابر مسخرة 24 ساعة للهجوم عليك والتشكيك فيك .. وناهيك طبعا عن إعادة إحياء وتلميع الكروت المحروقة القديمة (دور مني الشاذلي الآن) .. الكروت اللى كانت ضدك زمان و إختفت أو إتسحبت من على المسرح لحين الحاجة إليها فى الوقت والزمان اللى يحدده المخرج .. حالياً ابتدت ببنت الفاجومي و الأهداف أكبر من ذلك: مثل تلميع (طنطاوي .. أحبوش) ثم معلوف السجون (أبو اسماعيل اللي المفروض يخرج السنة اللي جاية) و الإخوانجي المغلف بشعارات الثورية و التوازن السياسي المسجون حالياً و اللي علي وش خروج الضابط السابق يحيي حسين عبد الهادي و متستبعدوش أبدا جمال مبارك اللي وقفوا ضد توريثه ييجوا يقفوا معاه لو أخد حكم رد شرف من المحكمة .. ليس لشيئ إلا لهدم مصر .. و أخيراً (بكار المكار) و ده الواد اللي عايزينه يقش و لو مش في ٢٠٢٤ يبقي في ٢٠٣٠ إن أمهلنا الله و عشنا

⛔️ من الاخر مطلوب انك تفكر مليون مرة قبل ماتقول لأ .. الموضوع اكبر بكتير من مجرد انقلاب أو اقتتال داخلى فى السودان وعلشان كدة ..

* الموضوع محتاج منك كمواطن عادى .. انك تخرج من النطاق الضيق للمشهد الحالى .. وتبص على الصورة الكلية .. وتفكر كويس جدا مع كل خبر تسمعه (من مصدر موثوق طبعا) .. ياترى الخبر ده معناه إييه .. والهدف من اللى بيحصل اييه .. وبــ يصب فى مصلحة مين ؟؟؟ .. ده غير الصب في مصلحة المواطن !!.

* لكن ..... وبرغم كل اللى بيحصل ده .. ماتقلقوش على مصر : بإذن ربنا مصر بخير .. مصر قوية .. وخليك متأكد ، إن مافيش مؤامرة بتتعمل على ضعيف ..

ومصر قدها وقدود وافتكروا إن أشد لحظات سواد الليل هى اللحظات اللى بــ تسبق الفجر.

* و متنساس أبدا إن وعيك أمن قومي .. أوقات كتير الكلمه بتبقي أخطر من السلاح .. في الآخر إللي شايل سلاح ده ممكن يموت واحد أو إتنين .. إنما اللي بيتكلم ده ممكن يِشيّل ألف واحد سلاح .. الكلمه زي الطلقه لو صابت الهدف قتلت العدو و لو أخطأت الهدف قتلت شعب

* ما واجهناه و ما نواجه ، ليس قصفاً من الطائرات المقاتلة والصواريخ، وإنما واجهنا أسلحة من نوع جديد تعتمد بشكل أساسي على طيف من الشباب والسياسيون والأكاديميون وشبكات علي الإنترنت من العملاء الذين باعوا ضمائرهم ودينهم مقابل حفنة من الدولارات،

* يعني إيه إرهاب بالنسبه ليا .. الارهاب مش مجرد ترويع بالسلاح .. فيه إرهاب أخطر بكتير هو إرهاب عقلي ، إرهاب نفسي ، إرهاب لغوي ، إرهاب معلوماتي ، إرهاب أمني ، إرهاب يغير برمجه المخ وتحويل الباطل حق

والعكس ، إرهاب مجتمعي قلب موازين الإتزان الأمني ..

* كلنا عرفنا معني الإرهابي اللي بيفجر نفسه أو بيهجم علي كمين أو كتيبه سواء جيش أو شرطه أو مدنيين .. بس في الحقيقه في نوع تاني من الإرهاب ، الإرهاب الفكري و الإرهاب العقلي أخطر من الارهاب الجسدي لأنه بيندرج تحت مسمي القنص العقلي 

* أسوأ و أقذر أنواع الإغتيال هو الإغتيال العقلي لما يتم توجيه من ناس معينه هدفها فقط القنص العقلي .. كلامهم زي الطلقه موجه لخلايا المخ للسيطره الكامله عليه عمليه برمجه عصبيه محدده الأهداف .. يقتل مجتمع ، يدمر بلد ، يشتت جيل كامل يدلس تاريخ فيحدث فتنه ويحدث تقسيم ، مع وضد نظام فرق تسد 

* العقل أمن قومي ومن يعبث بالعقل يطبق عليه نفس مواد التي تطبق علي الشخص الذي يعبث بالأمن القومي

حفظ الله مصر بقادتها وجيشها و شرطتها و المحبين الحقيقيين من أبناء شعبها ..