ما املكش غيره بقلم مراد ناجح عزيز

الشجرة اللي علي شبّاكك
أنا ياما طلعت عليها
أصبّح عليكِ
أشوف ضحكتك
وامشي ..
أكسّر حجر ف سجن الحياه
وازرعها جناين
والشوق عصافير بيغنّوا 
واعمل اراجوز لكل حزن يقابلني
واقوله : اضحك
لسه الاحساس بالدفا
ماشبعناش منّه
من أول السنة لأخرها
أحوش لحضنك قصايد
وأغاني
وانا بحلم أقابلك ..
الحلم ..
اللي انا دلوقت مااملكش غيره
وانا شايفك من بعيد
ع الشط التاني
...............
ف الوحده بلاقي روحي
__________
بحبِّك 
عادي يعني تكوني ليّا
عادي يعني تكون عنيّا ..
مش شايفه غيرك
لا تروح هناك ولا تيجي هِنا
عادي يعني الخوف عليكِ..
يحرمني الغُنا ,
والنوم
عادي يعني اقول مزكوم
ومش شامم للورد ريحه
وأقول علي كل حاجه مُتعبه
وأقول ع القصيده مُريحه
بحبِّك
عادي يعني الناس تلومني
ومايداروش
وتكون شهود النفي قِلّه
وشاهد الاثبات جيوش
واقول ف الوحده بلاقي روحي 
 وف غيابك مش لاقيها  
بحبِّك
بس ماأقدرش أقول بحبّك 
ومااقلش الحياه حلوه ..
غير وانتِ فيها 
................
بيحزن ف وقتُه
___________
القلب الطيّب ..
بيبان ف عنيه لّما تسلّم ..
يحضُن 
والحُضن حقيقي
وتحط عليه ولا يتألّم ..
يتعكّز علي جرحه 
وبيسامح
ويقول : بكره تلين ,
وتعدل ميزانها
وترجع بالسنين اللي هدّت حيطانها 
طفل صغيّر ..
بيلعب مع النجوم
وبيستحمّي ف كتاب المطر
القلب الطيّب ..
بيحب طول الوقت
وبيحزن ف وقته
زي ورد الجناين , بيعيش
ويموت 
ومفيش مواجع تفوت ..
وقدرت تغير طبيعته