منى حسن تكتب : من خواطرى .. ضحكة حياتى يا عين

 

 

عاوزه اقعد قاعده من اقعدات زمان, الناس تكون بتحب بعض مش عاوزين حاجه من بعض, بيحكوا من قلبهم وبيضحكوا بجد ضحكه من القلب, طلب مش صعب خالص ولكن مش مصدقه ان فيه شئ من الصعوبه او شبه الاستحاله انه يتحقق!!

الفترات اللى فاتت مواقف صعبه كتيرشوفتها حواليه, ظروف ناس متعدده  باشكال مختلفه, أوقات بمحن شديده جدا وصعبه

عن قرب وعن بعد وحكايات من كل حته وان مابقاش فيه اكتر منها..

 تتفاوت قوه الظرف, فتره عصيبه وطويله واكيد البنى ادم بيتاثر بظروف الناس اللى حواليه..

ساعات بتقرب اوى وساعات بتتقوقع لعجزك 

فى وسط ده فجاءه لاقيت انى عاوزه اقعد فى ضحكه, فى قاعده رايقه ,فى جو صافى, فى حكايه بسيطه تكون حواليه 

راجعت شريط طويل من كل حد بشوفه, اعرفه سواء منادى لصاحب لغريب لجار لحد ماعرفوش لعامل فى محل, مش قادره الاقى بسمه مش لاقيه ضحكه, الضحكه الموجوده مش الضحكه اللى هى من القلب ورايقه,  الضحكه مجرد وافقه مرسومه مالهاش معنى ! او حتى كلمه فى قاعده ولمه,  مش الضحكه اللى تعلم جواك و وتفتكرها  تتبتسم وانت لوحدك 

اه الضحكه ممكن تفرق فى الحياه وتهون, ولكن ده خلى همومى وزعلى للاحوال يزيد!

يزيد لدرجه انه احنا وصلنا لفين وان للدرجادى البنى ادمين بقت عايشه حزينه مهمومه داخله جوه نفسها ومجرد انها بتعيش وبتتنفس وتتعامل وتتعايش وقتى فى الحياه,  وده انبساطها علشان يعدى اليوم وخلاص

وكتير لمات كلها وشوش ومصالح,  ده غير الفضول ولا الكلام على بعض ده غير الانتقادات وحتى الحب وقتى زى الضحكه بكلاماته المتزينه

وناس وحيده مفضله وحدتها واتكيفت بحياتها وناقصها حياه ولكن راحتها اقوى من ان تسعد بشقاء..

حتى لمه الاصحاب مابقيتش فيها الضحكه, مقابلات قلبه جد يا موضوع مهم يا مرض يا سياسه, مبقاش فيه موضوع روحه خفيفه, الروح تقلت!

مافيش حاجه ايجابيه تكسر الظغوط او الهموم حواليك..

حانقول يمكن السن بأن كل ما البنى ادم بيكبر بيتغير

حاقول لا  لان حاولت اكسر واخرج من الفكر ده واناغش الجيل الاصغر بشويه ايجابيه لاقيتهم حالهم اصعب من حال الزمن الاكبر بيعافروا ويثابروا,  ويتذمروا من حالهم بانهم مش عارفين حايعملوا ايه,  ومجرد انهم متاعيشين ومش عايشين حتى لو حاولوا ينبسطوا بيبقى احساسهم وقتى..

ولما تقعد تحكى على ايامك يبقوا مبسوطين ويتمنوا انهم كانوا معاك فى وقتك ويتحسروا على حالهم  ويقولوا ازى! وهما وقتهم فيه كل حاجه !!

زمان كانت الروح خفيفه حتى بالحمل اللى كان وقته, اى حاجه بسيطه كانت بتحلى حياتك , دندنه لحن تدندنه, ضحكه من وش بشوش , نكته وقفشه طايره, برنامج له معنى فى الراديو, حاجات بسيطه تاثيرها جميل, كان كل حاجه بتعدى,

  دلوقتى الحاجه بقت بتوقيله جراك للارض ومقعداك فى مكانك, حركتك مش سهله, عجزك بيبان بسرعه حتى بصغر سنك, الوقت بقى تقيل, الضحكه بقت عزيزه اوى,  حتى اللى بيحب بقى يشوف ان الحب كماليات, ده غير اللى بيعيش على اده كان بيعرف يضحك زمان دلوقتى نسيها,  واللى معاه فلوس وكان فاكر ان ده الانبساط بيلاقيها انه اخرها مجرد وقت وسعادته مش عارف يميز مردودها..

افتكر زمان ان سعادتى فى قاعده بسيطه وكنت اهرب واعدى الشارع  اروح اقعد على سور شط النيل, والاقى بتاع سميط وترمس وبطاطا ودوم وسودانى سخن طالع دخانه من مدخنه العربيه جلابيه وعمه نضيفه, واقعد اكلم معاهم,  بساطه الكلام كان مليان ضحك واحترام, وتلاقى راديو تسمع ام كلثوم بتغنى على الهادى والعوامات كل واحد عايش في دنيته ومراكب التجديف وتدريباتهم.. رواقه

 دلوقتى لما تيجى تعمل حاجه زى كده بتلاقيهم  دوشه ويتلموا حواليك,وهرجله ولبس غريبوتقلق تاخد منهم حاجه,  وتشوفهم كلهم هم وكلام والفاظ يوجع الودن ولو سالته مالك حايقولك موال حسن الاسمر,

زمان كان بيغنى كتاب حياتى يا عين وكان ايامها ماكانش فيه بجد هم الزمن ده,  صحيح كل وقت له تعب بس المقياس مختلف

بس الاغنيه لسه عايشه لحد دلوقتى وكلامها بهم وتقل الزمن ده

انا بحب المواويل فيها حنين احبه, بس ماعمريش كنت حزينه

دلوقتى جوايه تقل بهم الزمن اللى حواليه,  نفسي الناس تصفى تانى وترجع الروح خفيفه, علشان الجو يرجع تانى ريحه تكون خفيفه على البشر 

نفسي الآدمية تتعاش صح

نفسي الانسان يرجع انسان

نفسي الخير والايجابيه ترسم بسمه تانى

 

وبرضه لسه نفسي فى قاعده رايقه بضحكه من القلب واصحاب بجد بتخاف على بعض ومش عاوزين حاجه من بعض الا بعض..