بيان عاجل من ديوان رسالة بعلم الوصول بقلم محمد ضباشه

بيان عاجل ومش آجل
وبنذيعه على أقساط
من اللى ع الكتاف راكب
من الزرقا إلى العياط
وسايق مُهرتي عنوة
ف ضوء غنوة صداها شياط
بتعمى الناس فى حتتنا
فتتحسر على اللى فات

على موجة إذاعتنا
ساطور يلقى البيان الهام
لناس قاعدة بتتاوب
من الضيقة ما عارفه تنام
لا ليها صوت ولا نائب
نصيبها من الحياة غائب
تبوس الأرض ما تعاتب
هوس غاوي يشوفها عياط

جنيهك جوه بحر التيه
لعام مرة وِعَوِّمْنَا
غرقنا معاه سعادة البيه
وكسحنا وما قومنا
نجيب اللقمة تشبعنا
ولو حتى ما لاقية غموس
لعفش الدار كمان بعنا
وجاى تانى علينا تدوس
سنين مرت بتتحايل
على عتمة وجهل نفوس
تغوص تشرب فى قلتنا
وتتكرع بلح أمهات

ف ايه تانى هنسمع ليه؟ 
وجيبنا ربى عالم بيه
ولا مخاوى ولا مداوى
ولا قادر يغمى عينيه
فى سوق نارها بتحرقنا
وحقنة كارهة تلحقنا
ولا ودانك بتسمعنا
وتلحق صرخة الأموات

فقل لى أنت عايز كام  ؟ 
عشان نلحق نبيع روحنا
ونديلك يا قهر تمام
عشان سوطك ما يجرحنا
بجد كرهنا مطرحنا
ماعاد فينا مكان لإمام
ينكد ع اللى ضاع يومه
وما قادر يقولك هات