بهي الدين مرسى يكتب: يارب

يا رب ... انا من الجيل اللى انضحك عليه بفساد الملكية وزعامة الناصرية وحضرت هزيمة 67 ونصر اكتوبر وحضرت تشرنوبل وبداية الضبعة النووي، وحضرت بناء السد العالي وانهيار مركز التجارة العالمي، وحضرت هدم سور برلين وبناء سور حول الكعبة.

انا عاصرت البلهارسيا والاسكارس والانكلستوما والالتهاب الكبدي سي والكورزنا.

اتحملت زعامة عبد الناصر وايمان السادات، وطناش مبارك، وهرتلة مرسي وهبعت لك على الخاص عمايل السيسي اللى عمّال يبعت وزيرة الصحة تطهر بلاد وهحكيلك على تفكيره اللي محير العباد لما خرج الناس من تحت انقاض العشوائيات وطلعهم يلسنوا لسكان الكمباوندات.

انا حضرت ايام لما كان الاسلام فرحة رمضان ومولد السيدة والحسين وزغاريد في وجود الشيخ مأذون، وحضرت امام الدكة ودعاة كتير اشكال والوان من ميلادهم لمماتهم وحضرت عبد الله بدر اللى سجنته امراة، وعمرو خالد اللي فضحته فرخة، ومعز ديوث ومجانص واعتذار حسان والحوينى.

عاصرت اماني ناشد وملك اسماعيل وانتهيت بلميس وبسمة وهبي، وحضرت من اول جولة الكاميرا وعالم البحار لغاية زنا المحارم في العاشرة مساء وعمرو اديب.

حفظت قصائد الالفية بتاعة مرتضي ابن ابي منصور ومشيت في جنازة عبد الحليم حافظ ورجعت حضرت سبوع اوكا واورتيجا وشربت كحول وديتول وكلور واتغرغرت بخل وليمون واتطعمت بالشلولو في زمن الكورونا.

لسه متأخر عليا حاجة تاني قبل ما اخش جهنم؟