كهربا: الزمالك ليه فضل عليّ ولكن الأهلى هو طموحى.. وناس كتير ساعدتنى فى الغرامة

علق محمود كهربا لاعب الأهلي على سداده الغرامة لنادي الزمالك قائلًا: "موضوع الغرامة كنت هيطول شوية حوالي سنتين تاني، وكابتن حسين لبيب شخصية محترمة وقربنا المسافات وربنا سدد في الوقت المناسب".

وقال محمود كهربا، خلال تصريحات تلفزيونية: "إحنا كرجالة بنعرف نجيب فلوس، وقلت أشتري نفسي وما كنتش هدفع وأكمل كورة كده، والموضوع يطول في المحكمة شوية وبعدها أعتزل، عشان الموضوع أنا مظلوم فيه، وفيه ناس ساعدتني في الغرامة؛ لأن الناس بتحب الاهلي أوي وبيحبوا كهربا اوي، لأني بطبيعتي وراضي".

وعن الأزمة بين شيكابالا وجماهير الأهلي أوضح: "وجهة نظري ما بحبش أتكلم عن لاعبين خارج النادي الأهلي، وطالما مش زميل ليا، وكان فيه مشاكل بين شيكابالا والجمهور، وأنا صاحبت شيكابالا، والجمهور بيعرف يعصب اللاعب، وعارفين الدخلة بتاعته وإزاي يضايقوه، وجمهور الأهلي عمره ما يغلط في حد، ودي سابقات بين الجمهور وشيكابالا، ما أعرفش مضى للأهلي ليه قبل كده، والأهلي طموح لأي لاعب في مصر وأفريقيا، وحلم لأي حد يلبس تيشيرت الأهلي".

وأضاف: "مباريات الديربي لازم نكسبها، وإحنا في الأهلي بنبقى داخلين عشان نكسب الماتش، لكن موضوع إن لاعبى الزمالك بيتربى جواها كره الأهلي ده ما أعرفوش، وإحنا في الأهلي عندنا نظام إننا روح جماعة، مش روح النجم الأوحد، وأنا في الزمالك كنت أنا ساعتها مش شيكابالا، وده ثقة مش غرور، ولعبي وأرقامي بيقولوا كده إني كنت أحسن وهو في حتة وأنا في حتة".

وفيما يخص أزمته مع كابتن مجدي عبد الغني قائلًا: "مضيت على بياض حبا في نادي الزمالك عشان اطلع إعارة لاتحاد جدة السعودي، وملوا العقد في 2017 وحطوا فيه 4 سنين، واتوثق في 2018، والمسئول عن ده كابتن مجدي عبد الغني، وما يعرفش حاجة عن حب وخير الأهلي عليه، ومصلحته أهم من حبه للأهلي، وليه أنا شاب ليه تظلمني وأنا من دور ولادك، ومصالح بينه وبين ناس كتير، وجريت ورا حقي وده اللي خلص عليا، وشهد وبصم ومضى ضدي، ومواجهتوش لأن حقى عند ربنا، وكل يوم وطول العمر بقول حسبي الله ونعم الوكيل".

وتابع: "أنا بالإنجازات اللي وصلت لها دلوقتي أكيد أنا مش ظالم، وربنا كرمني، وأنا عيل صغير بالنسبة له وهرد عليه أقوله إيه، وعمره ما يعرف يرد عليا بحاجة، اتظلمت ظلم وحش أوي، وربنا جابلي حقي الحمد لله، وأحمد مجاهد في نفس مركب مجدي عبد الغني، وطول حياتي مشتمتش الزمالك، وبحترمهم جدًا، ولازم يعرفوا إني مظلوم، ولما غلطت كنت في النادي، وغلطوا في أهلي، وأنا دخّلت للزمالك مبلغ كبير في الإعارات حوالي 84 مليون في الوقت ده".

واستطرد: "حققت مع الزمالك بطولات لكن كانت عندي طموحات أكبر من كده، ومن صغري وأنا اهلاوي وبحضر في المدرجات مع الألتراس، وكنت بعيط ساعات، وما حستش إني أكبر من الزمالك، وطموحي في الزمالك كان هيبقى صعب".

واختتم كهربا تصريحاته قائلا: "الزمالك له فضل عليا، لكن الأهلي كان طموحي الأكبر، وأنا أثق في نفسي من قدراتي لكن مش مغرور، ولما لعبت في البرتغال كان نادي صغير وما كانش هيقدمني، وجمهور الزمالك أحب أقولهم أنا ولا أذيتكم ولا شتمت وده اللي اتربيت عليه، واللي بيغلط فيا ربنا يسامحوا، وأنا اتحاربت كتير، وأي حد في مكاني كان عمل أكتر من كده، لكن اللي فات مات".