خالد أبو بكر يكتب : ومن حقوق الإنسان الحفاظ على حياة الإنسان ..مش قاعة وأغانى.. دى بلد راجعة من تانى.. بتتغلب على آلامها .. وبتحقق آمالها.. إحنا شعب جبار واللى يشوفنا يحتار.. بنحارب وبنبنى وبنغنى ونصلى

شوفت منتدى الشباب فى شرم الشيخ ؟ آه

وإيه رأيك؟ ياعم صرف فلوس كنا أولى بيها..  إنت مش شايف حال المدارس والمستشفيات!! مش كانت أولى؟

وإيه الفشخرة دى كلها شاطرين بس تقولوا إحنا فقرا وماعندناش!

لا .. حاسب

انت كده بتشوف تحت رجليك حتى لو صرفت فلوس انت عارف انت بتعمل إيه وليه؟

انت عارف إنك لو قلت للناس إنك واقف وبخير هايعود عليك الخير فى كل مكان، أيوة هايعود عليك انت وبشكل مباشر.

انت عارف كل واحد شارك فى المنتدى ده أو كل صورة طلعت من مصر عن حال مصر فى شرم الشيخ، ممكن تكون سبب لفتح بيوت ناس كتير.

انت عارف إن فى الظروف دى لما تصدر صورة زى دى تفرق قد إيه مع بلدك فى السياحة والاستثمار والوجود الدولى؟

انت عارف يعنى إيه تصدر قضيتك فى محاربة الإرهاب للعالم كله، عشان لما يضرب المثل فى محاربة الإرهاب تكون انت أول اسم.

انت عارف لما رئيسك يوصل رسالة للعالم كله وهو فى وسط نار الحرب إنها مش حرب بلده لوحدها دى حرب تخوضها الإنسانية كلها.

الكلام ده يا اخونا مش إنشا، ده فى شركات كتير جدا بتلجأ إليها الدول لتحسين صورتها.

علم وتجارة عالمية هدفه إظهار الدول وتصدير صورتها الإيجابية للخارج، وناس بتدفع فلوس كتيرة جدا من أجل هذه الصورة اللى بكل المعانى بتعود على المواطن فى مناحى كتيرة من حياته.

فى ظل مواجهات عنيفة تخوضها مصر ضد الإرهاب، أصبح العالم يسمع عن أخبارنا من عدد شهدائنا، كان لا بد أن نصدر صورة عن الحياة وعن الأماكن فى مصر، عن الشباب فى مصر، عن الإرادة فى مصر، كان لازم العالم يسمع ويشوف إن دى بلد واقفة ماحدش يقدر يركعها، كان لازم أعدائك يشوفوك إزاى بتحارب وفى نفس الوقت بتبنى.

الرئيس المصرى اللى كان قاعد فى المنتدى من كام يوم كان مطلوب منه يودع ولاده الشهداء، وفى نفس الوقت يخطط لضربة ترجع حقهم، ويواجه العالم ويطلب مساعدته ويرجع يبتسم ويستقبل ضيوفه فى شرم الشيخ، ويستحمل ساعات استماع ومقاطعات ونقاشات وكله على الهوا «ودى مخاطرة»، ويخلق الأمل ويبث روح إيجابية لشعبه اللى فى رقبته، لأن من غير شعبه مش هايقدر يحارب ولا يبنى ومن غير الأمل والطاقة الإيجابية لا هاينتصر ولا هايكمل بناء.

كان لازم يعمل كده ، كان لازم يدعو العالم كله عشان الدنيا كلها تشوف الصورة فى مصر وعشان انت كمان تشوف ثقل حجم قيادة بلدك.

كان لازم تقول للعالم انت قادر كدولة لما تدعو إلى حدث عالمى أنك قادر تستقبل وتأمن وتنظم وتبهر الناس.

اللى حضر من حضراتكم منتديات دولية فى أوروبا مش هيلاقيها بالرونق ده.

وأكيد احنا زايدين عن كثير من الدول العربية، لأن ولادنا فى الدول العربية هما برضه اللى بينظموا مثل هذه المنتديات فى العالم العربى كله.

يعنى هى مش قاعه وأغانى، ده موضوع كبير له أبعاد كتيرة.

طب شوفت الحالات الإنسانية اللى من دول العالم كلها واللى بتحكى وتقول حصل إيه نتيجة الإرهاب فى بلادها؟

عارف لما تدعو ناس عانت من الإرهاب فى أرض بلد بتحارب الإرهاب كل يوم، عشان يصحوا ضمير الإنسانية ويواجهوا العالم بسلبيته فى حربه على الإرهاب.

مين كان السبب فى هذه القصص الإنسانية المبكية؟ من هم الذين مولوا وخططوا ودعموا ووفروا الغطاء المالى والسياسى والإعلامى؟

إنها دعوة من مصر كى يقف العالم أمام مسؤوليته تجاه الإنسانية فى الحفاظ على أول حقوق الإنسان وهو الحق فى الحياة.

من أين أتى الإرهاب بالسلاح وبالسيارات وبالأجهزه؟ من هى هذه القوى التى لم تتأثر يوما بدموع هؤلاء الضحايا فراقا لأحبابهم أو تأثرا بآلامهم؟

ماذا سنفعل نحن العالم تجاه هذه الشعوب التى أجبرت على ترك أراضيها؟ وماذا سنفعل تجاه أراض دول باتت خرابا بسبب الإرهاب؟

كمان عاوز أقولك حاجة ومش من باب المعايرة ده انت اللى صنعتها، لو إحنا مش يد واحدة، وجيشنا مش على قلب رجل واحد، مش كان زماننا بنحارب فى بعض! واللى يطول يقتل التانى يقتله؟ وكل قائد ياخد فريقه وبلدنا تخرب.

لا انت لازم تعرف إنك مختلف، إحنا من عرق واصل واحد، وجيشنا أصله واحد، وبالمناسبة جيشنا ده انت اللى صنعته ربيت وكبرت وعلمت وسلحت، ولما تتباهى بملكك وصنعك ماتخليش حد يقول لك انت بتنافقه! أنافق صنع إيدى؟ أنافق حاجة أنا اللى بملكها؟

شوفت عدد المدعوين؟ شوفت عدد الصحفيين؟ شوفت التغطية الإعلامية العالمية لحفل الافتتاح؟ شوفت مواقع التواصل الاجتماعى فى العالم إزاى اتكلمت عن المنتدى؟

والله العظيم مش ناسى الصرف الصحى والتعليم والصحة، بس لازم نعيش لازم نكمل لو فضلنا فى طاقة سلبية مش هانقدر نكمل، لو العالم كل فكرته عننا إننا فى مكان ما فى الأرض بنحارب الفقر والإرهاب ماحدش هايعبرنا لا بسياحة ولا باستثمار.

أما بقى لو مش عاجبك الشاب خالد أو لحن الأغنية مجاش على هواك معلش يا سيدى أديهم اجتهدوا وعمرهم ما هيرضوا كل الأذواق.

طب تعرف إن فى رجال أعمال مصريين كانوا بيتسابقوا على الصرف على هذا المنتدى؟ طب تعرف إن هما دول نفسهم بيدفعوا فلوس كتيرة أوى لشركات علاقات عامة وتسويق فى العالم عشان بس يسوقوا لشرم الشيخ؟

طب تعرف إن هيئة تنشيط السياحة بتعمل مؤتمرات وسفريات بس عشان الدعوة لزيارة المدن السياحية؟

كمان مرة، عارف إن الأسعار والخدمات ووجع القلب اللى عندنا كتير بس برضه لازم نكمل ولازم نورى العالم أحلى ما عندنا.

ومش عارف ليه كل ما أى صورة حلوة تطلع يبان تقليب المواجع.

المضمون قبل الشكل كان حاجة تفرح فى شرم الشيخ، الصرف باين بفن وعلم وبشياكة ومش غلط الصرف، سواء كان من الدولة أو من رجال الأعمال. ويبقى السؤال الأساسى الذى يعبر عن مضمون الرسالة: أليس من حقوق الإنسان أن نحافظ على حياة الإنسان؟

إنه سؤال لضمير العالم طرحته مصر ورئيسها ومازال يحتاج إلى إجابة بالعمل وليس بالشجب أو التنديد.

لكن شد انتباه الجميع هذا الاصطلاح، ويصلح أن يكون شعارا عالميا، وهناك مؤسسات يمكن أن تساعدنا على أن نجعل هذا الشعار عالميا، حتى وإن بذلنا مجهودا أو دفعنا أموالا، فإذا أخذ العالم عنا وعن رئيسنا شعارا لمحاربة الإرهاب، فهذا مكسب كبير، فأنت ستكون فى ريادة الدول التى تحارب الإرهاب، وسيفهم المواطن الأوروبى والأمريكى أنك تحارب من أجل الدفاع عن الإنسانية وليس من أجل شعبك فحسب.

لكن أنا أتمنى أن نعرف كيف نروج لهذه المقولة عالميا وليس محليا.

خطابنا أصبح محليا، ولا يجب أن نكون لقد مللنا الحديث المحلى وأصبحنا فى حالة من الزهق والملل من تكراره، ونعرف كيف سيتحدث كل منا للآخر، لكننا حتى الآن لم نعرف كيف نحدث العالم بلغته.

إن نجاح الرئيس السيسى فى توصيل صورة الواقع من سعيه لتحديث الخطاب الدينى، ودعوة المجتمع الدولى لمحاربة الإرهاب، هى رسالة قوية وبدأت تنجح وعلينا استثمار هذا النجاح.

الصورة وبداية المضمون لهذا المنتدى مبشرة وعلينا انتظار النتائج.

نواب البرلمان عن مؤتمر شباب العالم: مصر رائدة خلق الحوار ونبذ التطرف

http://www.youm7.com/story/2017/11/7/%D9%86%D9%88%D8%A7%D8%A8-%D8%A7%D9%84%D8%A8%D8%B1%D9%84%D9%85%D8%A7%D9%86-%D8%B9%D9%86-%D9%85%D8%A4%D8%AA%D9%85%D8%B1-%D8%B4%D8%A8%D8%A7%D8%A8-%D8%A7%D9%84%D8%B9%D8%A7%D9%84%D9%85-%D9%85%D8%B5%D8%B1-%D8%B1%D8%A7%D8%A6%D8%AF%D8%A9-%D8%AE%D9%84%D9%82-%D8%A7%D9%84%D8%AD%D9%88%D8%A7%D8%B1/

توزيع صور :

1-    منتدى شباب العالم

2-    

3-