الرئيس السيسي: العمل على تطوير الحركة فى القاهرة يتم وفق خطة متكاملة.. ونهدف لتسهيل حركة السيارات بالقاهرة لمدة 10 سنوات مقبلة.. ويؤكد: "لولا خطتنا لتطوير الطرق لأصيبت العاصمة بالشلل الكامل".. فيديو

أكد الرئيس عبد الفتاح السيسى، أن العمل على تطوير الحركة بالقاهرة الكبرى يتم وفق خطة متكاملة، قائلا: "يهمنى أن الناس فى مصر تعرف وتحديدا فى القاهرة - اللى فيها أكبر كتلة حركة فى مصر كلها بالكامل-، إننا اشتغلنا بخطة متكاملة".

وقال الرئيس عبد الفتاح السيسى، أنه وفق خطة تطوير الحركة المرورية فى القاهرة الكبرى يتم تسهيل حركة السيارات لمدة 10 سنوات قادمة، متابعا: "وفق الخطة دى فى النهاية نقدر نقول إن القاهرة سواء شرق القاهرة أو غرب القاهرة حلينا فيها حركة العربيات يمكن لغاية 5 – 10 سنوات قادمين. 

وأضاف الرئيس السيسى، خلال تفقد الأعمال الإنشائية لتطوير عدد من الطرق والمحاور بالقاهرة الكبرى: "الناس لازم عارفة وسامعة الكلام ده دلوقتي.. كان الطريق الدائرى الفاصل ما بين القاهرة الجديدة وشرقا وبقية القاهرة.. وعملنا 16 محور للربط بين شرق القاهرة بالجزء اللى هو فى غرب القاهرة بالكامل". مضيفا "لما خلصنا ده اشتغلنا فى كل المحاور الداخلية وخلينا الحركة فيها يسيرة".

أكد الرئيس عبد الفتاح السيسى، أن خطة تطوير الطرق فى القاهرة منعت إصابتها بالشلل المرورى، قائلا: "لو مكناش عملنا الكلام ده خلال الـ 4- 5 سنوات اللى فاتوا كانت القاهرة أصيبت القاهرة بالشلل الكامل، وحجم العمل اللى اتعمل فى هذا المجال غير مسبوق وبتكلفة كبيرة جدا جدا ولكن فى النهاية النتائج فى الحركة، قلة التلوث، وتوفير وقت الناس وتوفير الوقود والتيسير على الحركة بقت ضخمة جدا".

وأضاف الرئيس السيسى "لما خلصنا القاهرة الجديدة ثم المحاور الرابطة ثم غرب القاهرة والدائرى مثل الميثاق وسميرة موسى وعمر سليمان والكلام ده كله، دخلنا فى اتجاه الجنوب، الجنوب زحمة". متابعا: "الجنوب زحمة، مهم نقول أن المقطم فيه كتلة سكانية كبيرة، الكتلة كانت بتتحرك إزاى، فيه فرق بين التحرك ببطء شديد أو التحرك بانسيابية". 

أكد الرئيس عبد الفتاح السيسى، أن العمل على تطوير الطرق فى القاهرة الكبرى مستمر بشكل متوازى، قائلا: "اللى بنعمله ده بنكمل ربط وسط القاهرة بشرق القاهرة.. وشغالين بمراحل.. وبالمناسبة فى نفس الوقت شغالين فى غرب القاهرة والجيزة علشان نعمل نفس الكلام".

وتابع الرئيس السيسي: "فى النهاية الكتلة اللى موجودة فى القاهرة وحجم المحاور اللى تم شقها فى شرق وغرب القاهرة يتيح للناس الحركة والحركة داخل القاهرة بقت سريعة شوية".

طالب الرئيس عبد الفتاح السيسى، القائمين على تنفيذ مشروعات الطرق والكبارى بالتحدث مع المواطنين، قائلا: "لازم نتكلم مع الناس ونعرفهم علشان يعرفوا إحنا بنعمل إيه، ولا تتعجلوا النتائج.. ولما اتعملت المشاريع كلها الناس حست اللى اتعمل كان إضافة كبيرة جدا وعمل لهم تيسيرات كبيرة.. وبنحاول بقدر الإمكان فى أقل وقت ننجز المشروع". 

 تحدث الرئيس عبد الفتاح السيسى، عن محور جديد يتم تنفيذه يسهل حركة المواطنين فى الوصول إلى القاهرة الجديدة بداية من كوبرى السيدة عائشة، حيث أنه مواز لطريق صلاح سالم.

وقال الرئيس السيسى، خلال كلمته على هامش تفقد الأعمال الإنشائية لتطوير عدد من الطرق والمحاور بالقاهرة الكبري: "المحور ده موازى لطريق صلاح سالم يا جماعة، يعنى أنا النهارده علشان أخليك تطلع على كوبرى السيدة عائشة على القلعة وتروح داخل على صلاح سالم للآخر أو تخش على طريق السكة البيضا، أنا عملت محور جديد أخليك تدخل منه لغاية القاهرة الجديدة من المحور ده". 

وتابع الرئيس السيسي: "ده حاجة تانية خالص وإضافته وتيسيره الحركة بشكل مسبوق، والكلام ده بيتعمل بتكاليف كبيرة، ولكن بيسهل الحركة ويوفر الوقود ويوفر فرص ويساهم فى القضاء على التلوث، هتلاقى أراضى هنا غير متاحة بقت متاحة وممكن نعمل خدمات للناس اللى موجودة، زى طريق الكورنيش قولت لهم وسعوا على الناس واعملوا كورنيش جميل لإسعاد الناس فى المقطم، عايزين ننجز، واعرضوا عليا تخطيط شارع 9".

أكد الرئيس عبد الفتاح السيسى، أنه يتابع كل الشكاوى، قائلا: "أنا متابع لأى شكوى وبأى شكل من الأشكال.. زى الطريق الساحلى.. وأنا بس عاوز أقول إنه المفروض أن الطريق ده يخلص 30/7 أو منتصف شهر 8".

وأضاف الرئيس السيسى، خلال كلمته على هامش تفقد الأعمال الإنشائية لتطوير عدد من الطرق والمحاور بالقاهرة الكبرى: "الطريق لما ينته بكل الشغل الفنى اللى عليه.. ثم بيتعمله الإرشاد اللازم.. ثم تتحط عليه عناصر الشرطة لضبطه زى ما إحنا عاوزين".

تحدث الرئيس عبد الفتاح السيسى، عن تطوير الطريق الساحلى، متسائلا:"معقول طريق كان حارتين ولا 3.. زى طريق بقى عرضه 6-7 حارات".

وأكمل الرئيس السيسى،"انتظروا لما الموضوع يخلص ويتشرح لكم.. أنا مستغرب جدا القائمين على الطريق مش قادرين يوصلوا أن الطريق مخلصش والإرشاد والتخطيط بتاعه لسه مخلصش.. وبالتالى هيبقى الحكم مش مظبوط".

تحدث الرئيس عبد الفتاح السيسى، عن الطريق الساحلى، قائلا: "هو احنا هنعمل الطريق على قواعد المرور.. ولا هنعمله وفق أسلوب الناس فى الحركة.. لا قواعد المرور يا جماعة ولازم كلنا نتفق على كده".

وقال الرئيس السيسى،: "كل الشغل فيه ناس تقعد تشكك فيه.. وبقول الكلام دلوقتي.. تشكك وتسيئ إليه بعد كل الجهد ده والتكلفة دي.. ودى ناس بتحاول تحط تراب على شغلكم.. مش الهيئة الهندسية ولا وزارة النقل.. لا ده على مصر.. وكأننا مش عارفين نعمل حاجة".

وتابع الرئيس عبد الفتاح السيسي: "الداخلية هتبقى موجودة.. وتخطيط الطريق هيتعمل وفق معايير الجودة العالمية.. وإحنا كمواطنين هنستخدم الطريق وفق القواعد دى".