راجي بشاي يكتب : الأوطان قبل الألوان

 

 

 

* الحقيقة اعلان استاد الاهلي بظهور ابو تريكه عليه علامات استفهام وتعجب كتير من الاعلان نفسه ومن القائمين عليه ومن مسئولي النادي الاهلي ..

‏* ازاي مسؤولي النادي الاهلي وافقوا مع القائمين علي الاعلان بالاحتفاء بشخصيه وإظهارها كأحد رموز النادي وهي مدرجة علي قوائم الارهاب وترقب الوصول بحكم محكمه من القضاء المصري وبناء علي تحقيقات من النيابه العامة ؟!! 

* مين اللى عمل الخلطبيطة دى ومن صمم الاعلان المستفز ده وبيذيع ويعرض على الشاشة وهو شايف غالبية الناس مستفزه، حتى بهاليل اللاعب نفسهم مصدومين ومش مصدقين أن ده بيحصل على قنوات الشركة المهيمنة على اعلام الدولة وتدير معظم قنواتها سواء حكومية او خاصة

* ده مش بس في الاعلان، ده كمان بيفتتحه بصورته وبيختمه بصوته!!تجوع الحرة ولا تأكل بتريكه،في انتظار هشام عشماوي في الاعلان القادم ما دام المهم الفلوس

‏* ظهور ابو تريكه بيقدم للناس أفكار القفز علي القانون او تخطي وتجاهل احكامه، وايضاً يروج لافكار الاخوان المسلمين ان احكام القضاء المصري ظالمه، فهل هذا مقصود من مسئولي النادي الاهلي اللي وافقوا علي ظهوره ؟!!

* مين اللى مصمم يضرب السلام النفسى ويؤجج الصراع فى نفوس الناس اللى بتحاول تهدأ وفى شهر المفروض أنه بالنسبة لهم شهر عبادة وروحانيات مش جدل وصراع عقيم ملوش تفسير ولا اجابة تريح الناس

‏* ليه ظهرت صورة الرئيس السيسي في مشهد مدرب النادي "الاجنبي" بالتحديد ولم تظهر في اي مشهد مش مشاهد رموز النادي المصريين في الاعلان ؟!! 

‏* ليه صورة الرئيس السيسي تظهر من الاساس في اعلان يحتفي برموز نادي كروي ويعلن عن استاد بإسمه ؟!! يعني ايه الغرض من ظهور صورة الرئيس خارج سياق محتوي الاعلان ؟!!

* الاعلان ده لو على قناة النادى كانت الأمور اختلفت وبقت واضحه، لكن الصادم أنه على قنوات ومنصات تحت أدارة أحد أذرع الدولة الاعلامية..هل أخذ هذا الإعلان موافقة الجهات الأمنيةكما يروج البعض ليظهر على الشاشات؟

‏* اكيد في الايام القادمة هنفهم وتظهر اجابات لعلامات الاستفهام ، لكن الأكيد الآن ان ظهور ابو تريكه مرفوض تماماً لان ظهوره يعتبر تخطي واضح وصريح لاحكام القضاء المصري، ومستحيل اي عاقل يصدق ان الاعلان ده عدي علي اجهزة الدولة وصرحت بنشره كما يعتقد ويروج البعض

‏* والأكيد ايضاً ان يجب التحقيق في الامر ومحاسبة القائمين علي الاعلان ومن وافق من مسؤولي النادي الاهلي علي ظهور ابو تريكه ضمن محتواه، لان ماينفعش دولة يحكمها القانون والدستور، يتم الترويج فيها لأفكار القفز علي القانون او تخطي وتجاهل احكامه

* يمكن لو حد طلع قال لنا الإجابة وفهمنا نقتنع ونرتاح بدل ما الناس ماسكه في خناق بعضها وكل واحد بينتصر لرأيه فى حين اللى عنده الحقيقة الكاملة واقف يتفرج .

* الظهور الرسمي المفاجئ لابو تريكة هو غباء من التنظيم ومن النادي لانه اثبت بما لا يدع مجالًا للشك ان الاهلي هو حصان طرواده الأهم للحفاظ علي وتلميع اعضاء هذه الجماعة الارهابية تمهيدا لعودتها للانقضاض في لحظة ما.

* قسماً بالله العظيم يمين يحاسبني عليه ربنا، لو البلد دي جرى لها حاجة، هيكون النادي ده سبب رئيسي .. واللي مش عاجبه كلامي يخبط راسه في الحيط، عشان أنا عارف إن فيه بعض الناس النادي ده عندهم أغلى من وطنهم .. وعرضهم كمان... بس ابقى خليه ينفعكم يا شاطر انت وهو لو بلدك جرى لها حاجه!!

* سأظل علي موقفي أن النادى الأهلى هو أكبر معقل للإخوان فى مصر و المصدر الرئيسى لغسيل أموالهم المشبوهة

ولو إدارة الأهلي كانت متعمدة وجوده علي الاعلان . فلتسقط إدارة الأهلي ويسقط الأهلي وتسقط الكرة المصرية وتحيا كل نقطة دم شهيد.