أهم أبطال الرواية بقلم عصام سامي ناجي

التاريخ مش ناوي

يروي يا حبيبتي أي حاجة

فابقي ركزي في الكتاب

ع المقدمة والديباجة

ولو قالوا لك إني ساذج

جاي أكتب في سذاجة

وساومت ع المبادئ

واشتراني كام خواجة

ارفضي كل الكلام

ما تصدقيش....

كنت عاوز يا حبيبتي

بعض أحلامنا تعيش

أحمي أطفالنا الصغار

م الخفافيش

ما انحنتشي وقلت

للأشعار كمان ما تنحنيش

قلبي كان أهم ابطال الرواية

وما اتكتبشي ع الأفيش

اتهموه إنه مدمن

وإن أحلامه بتتعاطى حشيش

لأنه أظهر الحقيقة

واللي كان ضده أساسا

شيخ طريقة

شتمه بافظع الشتايم

والعبارات البذيئة

***

والغريب في الأمر

والشيء والطريف

قلبي كان واعي وحصيف

ياما أرخ للممالك

وانتفض والجو كان

أسود وحالك.

وقبل ما تقولي سؤالك

شايف علي وشك أسى

هو انت فاكرة

أي حزن مررنا بيه

بسهولة ممكن يتنسى

الحياة يا حبيبتي

أصعب مدرسة