طعنة الأيام بقلم عصام سامي ناجي

أحلام الوطن ضايعة

ما بين الجهل والإسفاف

وبكرة للأسف بيخاف

من الضلمة وم المجهول

فرتب أوضة الأوجاع

عشان هي علي وصول

واعمل للضياع برنامج

سيبه يوصف أحوالنا

وسيبه يقول

سيبه كمان يتجلى

يجتث سنابل الغلة

ويهدر المحصول

***

نادي ع الحقيقة اسألها

هل ربت عيالها !!!؟

ولا سابتهم كدة

من غير ملامح واضحة

من غير كمان تربية

أكتب عن الحرية

غني للوطن أغنية

تحت المخدة حط الوصية

وأوعى الأماني تموت

قدامك طريق مظبوط

***

الشعر ياما وساني

لما قاعدت فريحة

مين اللي هيهز الوجع

مين حيحركه ويزيحه

من طعنة الأيام

أصبح فؤادي جريح

وأنا اللي طول عمري

شاعر كدة وفصيح

ياما حاولت أتصدا

لعنفوان الريح