راجي بشاي يكتب : دماغ الراجل و دماغ الست

 

لو دخلنا دماغ الرجل ودماغ الست هنلاقي ايه ؟

دماغ الراجل فيها صناديق :

• صندوق لكل شيء

• صندوق ل العربية

• صندوق ل الفلوس

• صندوق ل للشغل

• صندوق ل للعيال

• صندوق ل للست (ليكي ) أو لغيرك .. إنتي و نصيبك

• صندوق لحماته (جمب اوضة الكراكيب )

• صندوق فاضي .. صندوق الولا حاجة .. أيوه صندوق الولا حاجة و ده ليه مكانة استراتيجية خاصة لكل راجل

نصيحة لأي ست : متلمسيش اي حاجة جوه أي صندوق

و لما الرجل يناقش حاجة بيطلع الصندوق بتاع الحاجة دي و بيتناقش في اللي جوه الصندوق ده بس (بسسسسس ) .. Always monotask

و خللي بالك من الراجل اللي دماغه متكلفة .. ألبسي جوانتي و كمامة و انت جاية تبصي علي أي صندوق عشان مفيش حاجة تضرب في وشك..

دماغ الست :

• دماغ الست كلها اسلاك .. مخ شبكي عنكبوتي .. وكل سلك متصل بكل حاجة و أي حاجة متوصله بكهربا (المشاعر ) و هو ده السبب إن الستات بيفكروا في كل...كككككل حاجة في نفس الوقت - Always multitask - عشان لو فيه حدث واحد و وصلته بالمشاعر هيفضل في ذاكرتها و هتفتكره للأبد ..

• الرجالة عكس كده تماما ..ليه ؟ بكل بساطة عشان مش بيهمهم التفاصيل اللي بتقعد الستات تنكد علي نفسها بيها .. إنما الستات بتهتم بـككككككل حاجة و بتحب تربط كل حاجة بكل حاجه و كهربا و مشاعر زززززز

** نيجي بقي لأهم حاجة زي ما قلنا عند الرجالة و صندوق اسمه : صندوق الولا حاجة .. ده لوحده محتاج شرح .. ورقة و قلم يا ست الكل (بصوت الشيف شربيني) ..

• صندوق الولا حاجة هو الصندوق المفضل و اهم صندوق:

• عشان كده قعدة القهوة هي أحد أفضل هوايات الرجالة – بيعملوا اللا شيء

• أو ممكن يقعد بالساعات ماسك الريموت بتاع التلفزيون و بيتفرج علي لا شيء

• الستات عندهم مشكلة عشان طول الوقت ززززززز كل حاجة شغالة و عشان كده فعلا مش فاهمين يعني ايه صندوووق الولا حااااااجه و عشان كده الستات بيتجننوا لما الرجالة بتكون بتعمل اللا شيء

بتيجي الستات بقي تعمل ااااااايه .. تيجي الست للراجل تقوله :

*ممكن اخش معاك جوه صندوق الولا حاجة ؟

-الراجل : لااااااا

*الست : ليه لأ ؟ و دايما هترجم و تفكر : كده يبقي فيه حاجة ؟

-من جوه عقل الراجل : لاااااا اطلعي بره محتاج أعمل ولا حاجة

و ده بيوصلنا نفهم الفرق بين الستات و الرجالة لما يكونوا مضغوطين نفسيا:

لما الراجل بيكون -STRESSED – مضغوط نفسيا:-

• كل اللي عايز يعمله يخش جوه صندوق اللا شيء و آخر حاجة عايز يعملها و هو مضغوط (إنه يتكلم عن اللي ضاغطه )

• هو مش عايز يتكلم ..هو عايز يبحلق في الحيطة و يشوف الدبانة و هي تلف من السقف للحيطة! والله زمبقولك كده..

• تيجي الست بقي : "بتفكر في ايه ؟ "

- يرد الراجل بعد لحظات ... "ولا حاجة "

• الست : أكيد بتفكر في حاجة !

- الراجل : "ولا حاجه ..ولا حاجة "

و النصيحة الذهبية للست اللولبية لما يكون الراجل مضغوط : سيبيه لوحده - مش هيموت - سيبيه يخش صندوق الولا حاجة هيرجع كمان شوية!

لما الست بتكون -STRESSED -مضغوطة نفسيا:

• بتبقي عايزه تتكلم عن اللي ضاغطها.. لو متكلمتش دماغها حرفيا هتنفجر

• الحل دايما الأمثل لكل مشاكل الستات : تعاااااالي نتكلم .. اتكلمي معايا .. عشان تطلع اللي جواها و تخف الضغط اللي جوه الحلة البريستو!

حاجة كمان هتريحك أوي و تعرفك الفرق بين الرجالة و بين الستات في استخدام الكلمات:

=الرجالة و الكلمات :

• الرجالة بتستخدم كلام اقل من الست

• بيقولوا لو الراجل محتاج 10,0000 كلمة في اليوم الست محتاجه 20,000 و هتلاقي الست تبررلك و أنا من مكاني هنا بتبررلك برضه : "عشان بنحتاج نعيد كل حاجة بنقولهالك ! "

عملوا تجربة كان بيحكيها جون جراي -American relationship counselor, lecturer and author أن حطوا في الحضانة كاميرا و ركزوا علي البنات لقوا إن البنت لو ملقتش حد تتكلم معاه ..هتكلم نفسها ! و كتير من الستات خلاص خلصت حضانة و لسه بتعمل كده !

آه صحيح ولو البنت ملقتش حوار تقوله لنفسها لقوا في الحضانة إنها عماله تدندن "لالالالالالا مامممم لالالالالالا" مش بيسكتوا ! طبيعة بشرية هنعمل ايه ؟!

= فيه قاموس للكلمات و للتوقيت و حتي التنهيدة ليها معني مختلف عند الراجل و الست اكتشفه جون جراي بيوضح الإختلافات زي دي مثلا في الوقت:

ال 5 دقايق

• للراجل يعني 5 دقايق

• للست لوقت طويل المدي غير محدد

أكيد كل الرجالة سألت السؤال ده لمراتتهم قبل ما يخرجوا :

-أنتي جاهزه ؟

•5 دقااااااايق

و تمر فترة ....... انت و نصيبك .. ممكن تشوف فيلم أو ماتش كورة عشان متزهقش و متقعدش تسأل كتير.

مثلا في الكلمات:

* ال ولا حاجة معناها عند الراجل = ولا حاجة

انما لو الست قالتلك ولا حاجه : خااااااااف و اقلق .. ااااااااااجري

* ال هححح - التنهيدة

• عند الراجل : ماشي الحال .. تمام 

• عند الست : جابت آخرها و فيه مصيبه

* لما الراجل يقول "اتفضلي " فهو مؤدب

• لما الست بتقول "اتفضل " : هي بتديك فرصة تشرح أي حاجة نيلتها و دي فرصتك الأخيرة للنجاة و خلي بالك و ركز و أنت بتشرح بدل ما تلاقيها آخر الشرح بتقولك "هححح" و كده يبقي هتلبس مصيبة يا معلم

*لما ييجي الراجل يحكيلك حاجة: كذا كذا حصل و بعدين قام كذا حصل و خلاص .. الملخص المفيد!

لكن لما تيجي ست تحكيلك : هي بتعييييييييييش اللي حصل تاني و هي بتحكي بأدق تفاصيله و بكل حواراته و الأحداث لازم تتقال بكل مفردات اللغة العامية و الفصحي و القصة اللي بتتحكيلك لازم علي الأقل تاخد نفس وقت الحدث اللي حصل .. إنت و نصيبك و كمية مسكنات الصداع اللي عندك!! 

و ده كان ملخص بسيط للخريطة اللي في دماغ الست و دماغ الراجل و ربنا يقدرنا علي فعل الخير.. سلام مؤقت!