اكتر حاجة بتوجع بقلم الشاعرة سارة عبد الرحمن صاحبة ديواني أوضتين وسارة و أنا سارة يله

اكتر حاجة بتوجع لما..

تقابل مين جرحك قدامك،

والصدفة تلعب لعبتها..

فتتسمر وتقف في مكانك

و دموعك هي اللي تردد..

كل وجع مش ناطقه لسانك

مبتبقاش فاكر غير غدره

واذيته.. وقت أما اهانك.

تمشي شوية ..قال يعني 

خلاص ...عدى الموقف!

لكن نفسك تسمع صوته

بيجري عليك وبحبك يحلف

أحلامك مش قادرة تبطل

تدي أمل لواحد متعطل..

فتخونك من تاني مشاعرك

وتقلل باديك من سعرك..

لما تلف عشان تندهله ..

تتفاجىء بصحابه واهله 

بيباركولوا  ...هو وشابة،،

قطمة ظهر إزاي تتخبى 

وتطبطب على جرحك تاني 

صدمة تكرار إنه أناني ...

مش قادرة تفارق تفكيرك 

ايه تفسيرك؟! ايه تفسيرك 

ايه غير إنك، ناسي بانه 

بيكبر سنك ،، واللي متبت 

فيه  مش ليك..الله يهديك

طب فكرني بيوم فيه صانك