د. بهي الدين مرسى يكتب: عبارات خادعة .. اوعى تصدق!

- مفيش حاجة اسمها خلطة، أو عشب، أو توليفة، أو تركيبة تغسل الكلى.. الكلى مش خيشة متعاصة بول عشان تتغسل.

- مفيش حاجة اسمها تنظيف كبد بوجبة، او بوصفة أو تعويذة.. الكبد عبارة عن عضو مليان وظائف كيماوية وبيولوجية واذا مقدرش يتخلص من المواد السامة بنفسه، فلا جدوى من استخدام الوصفات الموصوفة إلا بالمنع، ولكن يستفيد من نمط غذائي في مرض معين.

- مفيش حاجة اسمها طاقة إيجابية أو طاقة سلبية.. ده كلام فارغ ودي عدة النصب بتاعة دجالين الإعلام وبرامج الشعوذة زى اللى في قناة دريم. الطاقة هى الطاقة كما يصفها علم الفيزياء (Energy) أمّا الألفاظ الشائع استخدامها فهي الوان سفسطائية من الكلام - لا أكثر.

- مفيش علم اسمه تفسير الأحلام.. إلا في قناة دريم، لأن الأحلام عبارة عن مزيج من ردود أفعال النفس + أمنيات عالقة بالعقل الباطن + كبت أو قهر نفسي + مخاوف أو انفعالات ,طبعا بتفرق حسب السن والجنس والثقافة والنشأة .. ولا يوجد دلالة ثابتة لمرئيات الاحلام، فليس رؤية السمك عند كل الناس له نفس المعني، ولا رؤية الطفل معناها كذا عند الجميع. الامور نسبية، وما تراه يخصك وحدك، يعني السمك عندي له معنى غير  اللى عند ام سحلول.

- مفيش حاجة اسمها الطب النبوي. سيد الخلق عليه الصلاة والسلام لم يدرس الطب ولم يعلمه الله الطب ولم يوحي اليه بالطب، ولا يتفق شرف النبوة مع ادعاء علم الطب، وإلا لكان هناك بجانب الطب النبوي الهندسة النبوية والجغرافيا النبوية .. معظم الأحاديث التي نسبت إلى النبي الكريم عليه أفضل الصلاة والتسليم مغلوطة، وهى مادة يتاجر بها النصابون وأدعياء التداوي. لاحظ أن ما جربه النبي  أو استخدمه في عصره اتيح أيضا للكفار واستخدموه.

- مفيش حاجة اسمها نزلة برد عشان خرجت من سخن لبارد أو جاله مرض عشان خرج من بارد لسخن.. جسم الإنسان يتمتع بفسيولوجيا الحماية من خلال الأوعية الدموية وجهاز المناعة، ومش مجرد لوح صفيح الانتقال بين السخونة والبرودة يبهدله.

- مفيش حاجة اسمها عندي حساسية وتسكت .. لازم تحدد ضد ايه: ضد بروتين معين في الأكل ، ضد نوع من الأحماض الدهنية ، ضد كذا .. لكن هاتسمع عن واحد جاله حساسية من حقنة بنسلين (وده وارد) يقوم أهله يمنحوه لقب "عنده حساسية" ويشيل قصادها اتهامات ضد البيض والسمك واللبن والشيكولاتة والخميرة و...و.... وخد بالك أنا عايزك على مسئوليتي تاكل بيض مع سمك واشرب بعدهم تمر هندي ولا هيحصل اي حاجة وكل موز مع بانادول، واشرب سفن آب مع أسبرين ومش هيجيلك تفتت في الكبد !!

- مفيش حاجة اسمها تدريبات الخبير زى اللى بتشوفها في تمرينات الإيروبيك الصباحية في التليفزيون .. أى رياضة تحرك فيها عضلاتك هتاخد منها نفس العائد .. العبرة بمنطقة العضلات وزمن التدريب مع تكراريته.. لكن عشان يقولك ثنى الجزع لليمين 4 مرات وللشمال 5 مرات ولو لخبطت في العدد راح عليك التمرين - كدااااابين.

- اوعى تصدق منتج مليان فيتامينات تدهن به جسمك يقوم الجسم يستفيد بها.. لا البروتين ولا فيتامين C ولا فيتامين  A ولا فيتامين E ممكن الجسم ياخدهم عن طريق الجلد .. المواد الغذائية دى لازم تدخل جوه الجسم وتخضع للتمثيل الغذائي وتتوزع على الخلايا وفق قواعد الجسم بيحددها.

- الشعر - أيا كان موضعه - هو منتج ميت وكذلك الأظافر.. لذلك لا فائدة من التداوي أو المعالجة بعد نموه.. صحة الشعر تخضع للحالة الصحية والغذائية قبل خروج الشعرة من داخل بصيلات الشعر في المهد، لكن بمجرد خروجها على سطح الجلد لا تستفيد بأي مادة غذائية الا اذا كانت على شاكلة النانو- جزيئية، وكل ما تشاهده من تنعيم أو ترطيب هو مفعول فيزيائي للمواد المستخدمة لا أكثر.

متعكم الله بالصحة والعافية وحماكم من النصب والجدل وتفسير الأحلام وقراءة الطالع، خلينا نفوق شوية يمكن نبقى زى اليابان من 65 سنة.

باختصار ... تفتكر لو ملأت خزان الوقود في سيارتك كاملا، فهل تتوقع زيادة سرعة السيارة؟ كذلك الجسم، لو انك ظللت تحشوه بالفيتامينات وكبسولات الطاقة والمغذيات فلن تزداد حيوية الجسم، بل قد تؤتي آثارا عكسية.

د. بهي الدين مرسي.     Baheyeddin Moursy