راجي بشاي يكتب : لجنة فحص المقبلين علي الزواج

تصوير نهاري داخلي..
لجنه فحص المقبلين علي الزواج برئاسة قاضي و أربعه اطباء..
طبيب أمراض نفسيه
طبيب جلدية و تناسلية
طبيب باطني
طبيب جراحة تجميل
يدخل المتقدم للجواز:
⚫️ القاضي: في البداية معاك وصل الإشتراك في الصندوق؟
- العريس: ايوه يا فندم..بس خلوني أشترك مرتين!
القاضي: ازاي الكلام ده؟..انت مقدم علي انك تتجوز واحده و اللا اتنين..
= العروسه للعريس: انت مقدم تتجوز واحده تانيه غيري!
القاضي ضاحكاً: احنا بنهدي النفوس..هو إشتراك واحد بس و الباقي رسوم..
-العريس: رسوم بتاعة إيه يا باشا؟
القاضي: رسم إجراء كشف طبي ثم رسم إجراء تحاليل طبية..
-العريس: ثم !!
القاضي: رسوم لجنة برئاستنا و معانا ٤ دكاترة ثم رسوم لجنة للتأكد من سلامة العقد ثم رسوم لجنة للتأكد من سلامة الشاب و الفتاة..
-العريس: ثم !!
القاضي: رسوم المأذون لتوثيق العقد ثم رسوم ...
- العريس مقاطعاً: هو فيه رسوم إيه تاني يا باشا
القاضي: زعلان انك دفعت فلوس لمصر بلدك .. لو عايز تتجوز و تدوق .. لازم تحط في الصندوق!
- العريس: مفهوم يا فندم..المهم مصر تنبسط..
القاضي: طيب ..انت عاوز تتجوز ليه؟
- العريس: سُنّة الحياه يا فندم..
القاضي: بص..من أولها كده هتقولي الاجابات النمطية بتاع سُنّة الحياة و اكمل نص ديني هاعتبر طلبك لاغي..أوعي تفتكر ان فلوس التبرع للصندوق معناها ان اللجنة هتوافق.
- العريس: هو بعيداً انها ردود منطقية و غير نمطية..لكن الجواز هو النهاية الطبيعية لأي علاقة عاطفية.

???? يتدخل الطبيب النفسي: نهاية!! .. يعني انت شايف الجواز نهاية مش بداية.
- العريس: نهاية علاقه و بداية حياة..
الطبيب النفسي: ممكن تحدد أكثر تقصد ايه بنهاية علاقة..
- العريس: النتيجة الطبيعية المحترمه لأي علاقة عاطفية جاده..
الطبيب النفسي: انت تعرفها بقالك اد ايه؟
- العريس: هيفرق مع سعادتك في إيه!
⚫️ القاضي: لو قاطعت الدكاتره تاني هاكتب لاغي علي الطلب بتاعك و هنعتبرك غير مؤهل للجواز و مش هتقدر تقدم تاني الا بعد خمس سنين..
- العريس: لا خلاص ..أعرفها بقالي سنة..
الطبيب النفسي: و إنت شايف إن سنة فتره كافيه انك تحسم فيها قرارك بقرار مصيري زي الجواز؟
- العريس: اه فتره كافيه جداً..و يضحك بعدها
الطبيب النفسي للعريس:ايه اللي بيضحكك؟
- العريس: لا افتكرت حاجه كده..
⚫️ القاضي: قول ضحكنا معاك..
- العريس: افتكرت حلقه ابراهيم نصر بتاع زكيه زكريا لما كانت عامله دكتور نفساني و بتقول للضيف انت توتولاني..يعني اتزحلقت و انت صغير علي صابونه في البانيو و رأسك اتخبطت!
الطبيب النفسي: لا انت جاي تهرج بقي..بعد ما الدكاترة تكمل كشف تخش الحمام تجيب عينة بول عشان نعمل لك تحليل مخدرات
- العريس:ملوش لازمة يا بيه .. هو أنا لو فايق كان إيه اللي جابني هنا..
= العروسة للعريس: أبوس ايدك لم الدور و بلاش جو الكوميديا ده علشان حاسه هتقلب بدراما..
???? طبيب الجلديه و التناسلية: قولي يابني..انت عندك حكه؟
- العريس: ايوه الحاجه والدتي..مالها..
طبيب الجلديه: الحاجه والدتك ايه يا عم الظريف..حكه..بتهرش يعنى!
- العريس: لا يا فندم..ما عنديش جرب و لا مقمل و لا عندي حساسية..
الطبيب: عندك دوالي في الخصيتين؟
- العريس: لا الحمد لله .. فابريكة..
الطبيب: عندك عِنّة؟
- العريس: مش فاهم..
الطبيب: يعني ي ي ي..
- العريس: لا يا باشا .. ده أنا و لا سلطان في غبي منه فيه..
الطبيب: و انت فاكرني ضبش و هقول "الله يكون في عونِك يا سامية" .. بعد ما تخلص مع الدكاترة .. خد برطمان و خش هات عينة سائل يا ظريف..
- العريس: ده غير عينة البول؟..ما قولتلك يا دكتور أنا مِيّة مِيّة..
الطبيب: بلاش طق حنك .. لازم العينة يعني لازم العينة..
-العريس: مفيش وسائل مساعدة يا دكتور؟
⚫️ القاضي: إحترم نفسك بدل ما أحبسك بتهمة خدش الحياء العام!
???? طبيب الباطنه: قولي يابني..عندك تاريخ عائلي للسكر و الضغط؟
- العريس: العيله كلها يا فندم..
الطبيب: انت ما تعرفش ان ده ممكن يأثر علي الخصوبة و الأداء.. كده هتترفض أمن و متانة..
- العريس: ما هو لو علي كده ابويا جابني ازاي؟
⚫️ القاضي: يا بني بلاش تعيش في دور محمد هنيدي..انت شكلك جاي تبوظ الجوازة..ما تشوفي خطيبك ده يا عروسة..
- العريس: يا باشا امراض الضغط و السكر عند كل الشعب المصري..لو علي كده ما حدش هيتجوز بقي .. هو فيه إيه ما يجبش الضغط و السكر: العيشة و اللي عايشنها و المواصلات و الزحمة و الأسعار و البنزين .. أكمل و للا كفاية يا باشا..
⚫️ القاضي: لم الدور يا ابني أحسنلك..
= العروسة: إكتم يا منيل .. خلينا نخلص في يومنا الأسود ده..
???? طبيب التجميل: قولي يا بني..ايه رايك في عمليه تجميل أصاله نصري؟
= تتدخل العروسة: هو حضرتك اللي عملتها؟..تسلم ايدك بجد..
طبيب التجميل: شكلك بتفهمي يا عروسة .. طب إيه رأيك في النحتاية الجديدة بتاعة هيفاء؟
= العروسة: و لا أجمل و لا أروع يا بروف "بصوت أحمد شوبير"..
- العريس: انا بقي شايفها تغيير في خلق الله..
الطبيب: يعني لو مراتك في المستقبل طلبت منك عمليه..هتوافق..
- العريس: طبعا لا…
الطبيب: كده مفضلش غير إنك تطلع تختمها من مدام سميحة في الرابع!
العريس: ما هي ورقة الطلب مختومة قدام سعادتك يا دكتور..
الطبيب: العروسة يا ابني .. العروسة !
⚫️ القاضي: طيب كده اللجنه خلصت و هنعرفك التقرير بعد أسبوع.. و لو هنجوزك هنجيلك في الصباحية ناخد نسبتنا في النقطة!
- العريس: انا يا باشا عرفت من دلوقتي و اقتنعت اني ما أصلحش للجواز
انا بس ليا طلب عند مصر.. يا ريت ترجعلي الفلوس اللي حطيتها في الصندوق..
⚫️ القاضي: هو اللي بيروح عند الحكومة بيرجع .. راح في الصندوق ..
- العريس: خلاص..مش عايز أتجوز و لا أدوق و لا عايز فلوسي اللي في الصندوق..كل صندوق و انت طيب يا باشا..
⚫️ القاضي: يبقي تطلع علي الخزنة تدفع ضريبة السَنْجَلة!!