راجي بشاي يكتب: قواعد فهم الكائن الرجل

بيقولوا إن الرقم ٢١ هو عدد يشير إلى وقت تجسيد الحلم وتحقيق الخطط ، فهل تحمل هذه القواعد ال ٢١ تحقيق الحلم في فهم الكائن الرجل؟!

1 - يقال إن في جزء في دماغ الرجاله إسمه nothing box

وده غالبا لأن ربنا خلق ادم الاول لوحده ...

فتلاقيهم فجأه قاعدين لوحدهم وساكتين وسارحين في

ال .. ولا حاجه ...  فلما تلاقي الراجل كده متقعديش تشغلي دماغك وتتعبيها وتسأليه كل شويه مالك .. مالك وتفضلي تزني ... هو حضرتك مافيهوش حاجه ... هو خلقه ربنا كده .. سيبيه في حاله ..هو هيرجع يتظبط لوحده

2- الراجل ما بيتسئلش تحب تاكل إيه .. و بإجماع العلماء الراجل مستعد يحفر نفق في جبل جرانيت باستخدام الشوكة و السكينة .. و لا إنه يتسأل تحب تتغدي ايه بكرة .. الراجل يتحط قدامه الأكل و ياكل في سلام.

3- الرجل بطبعه فاقد الإحساس بالزمن .. و التخطيط الإستراتيجي طويل الأجل بالنسبة له التفكير في الوجبة القادمة .. و ساعات بيكسل يعمل كده كمان.

4- زي ما الست بتبقي "عايزة ورد يا إبراهيم" الراجل بيبقي عايز: " A little personal space يا زينب".

5- الشاي بتاع الصحيان من نوم العصرية من مقدسات الرجل و لو إن نوم العصرية ما أخدش فيزا في بلاد المهجر.

6- الراجل إللي بياخد باله من تغيير نوع البرفان ده راجل معدل وراثيا مش أصلي .. الراجل الأصلي مش بيشم أصلاً.

7- المثل الإنجليزي بيقول "الرجل الجوعان هو رجل غضبان" .. أدينا حذرنا.

8- الراجل بيحب الأكل أكتر من أي حاجة في الدنيا .. أكتر من الستات و العربيات و الفلوس و المنصب .. المنافس الوحيد للأكل هو النوم.

9- أكاد أجزم إن كل الشرور و الآثام إللي في الدنيا سببها الأصلي راجل إتسأل و هوه لسه صاحي من النوم ح ناكل ايه أو إتطلب منه فلوس.

10- الرجالة و هم بيتفرجوا ع الكورة يا زينب بيبقوا طرش .. بالمعني الحرفي للكلمة .. لو عايزة حاجة تروحي بالراحة جدا و تتسللي من ورا العبيد إللي واقفين يهووا بمراوح ريش نعام جنبه .. و تفتحي كانزاية البيبسي المشبرة .. و تصبي بالراحة في كوبايته المفضلة من غير ما تتكلمي .. و تخرفشي بكيس اللب السوبر في نعومة و تفضي نصه في طبق صيني عشان يعمل صوت .. و تجيبي طبق كبير يرمي فيه القشر عشان ما يتعبش و هوه بيتف .. و بعد ما الماتش يخلص تسأليه علي الحاجة إللي إنتي عايزاها هيرد من أول مرة.

11- الستات بتعرف تفوق بنسبة 100% بعد الصحيان بعشر دقايق .. الراجل في جميع مراحل نموه من ساعة ما يصحي من النوم و لحد ما يوصل الحضانة أو المدرسة أو الجامعة أو الشغل .. و لمدة ساعتين تلاتة بيبقي مرشوش عليه بيروسول .. بس بكمية لا تكفي لقتله .. بصوا علي أي راجل ماشي علي رجله أو راكب مواصلات أو سايق عربية الصبح .. ذبابة تتعافي جزئيا من رشة مبيد حشري.

12- دور البرد بيسحب الحياة و الطاقه من الرجالة زي الكريبتونايت بتاع سوبرمان بالظبط.

13- الغالبية العظمي من الرجالة خُرس .. و إللي بيتكلم مش بيتكلم في البيت .. أي محاولة لتغيير مجري الطبيعة حتؤدي إلي كوارث.

14- في أي زمان و مكان و مهما كانت درجة تعقيد المشاكل مفيش حاجة ممكن تمنع الراجل إنه يبتسم قدام طبق بطاطس ملظلظة محمرة في الزيت او طبق كشري و يا سلام لو متوصيه بالعدس أبو جبة و البصل المحمر.

15- الراجل إللي بيسلك بلاعة مسدودة .. أو بيغير لمبة محروقة .. او بيصلح حاجه في البيت .. ده إنسان بكل ما تحمله الكلمة من معني

16- الرجالة ما بتتكلمش بعد الأكل.

17- تغيير مكان المحفظة أو الدبلة أو النضارة أو الساعه أو الموبايل بالنسبة للراجل ده مشروع قومي .. بيتم بالتعاون مع اليونسكو .. فما بالك بتغيير مكان دولاب أو كرسي أو كنبة .. عايزة الراجل يقعد لك في البيت ما تشيليش حاجة من مطرحها و هو موجود.

18- الكوليسترول و الدهون جزء أساسي من مكونات خلايا الراجل .. فبلاش الكلام الجارح بتاع الكرش و الريجيم عشان مش ناقصة سم بدن.

19- عايزة تعرفي الراجل بيحبك قد إيه خليه جاي من بره .. و مش شايف قدامه .. و حطيله الأكل .. و مع أول لقمة في بوقه قولي له عملت إيه في موضوع كذا إللي كلمتك فيه من كام يوم .. لو فضلتي عايشة يبقي بيموت فيكي و ده غالبا إللي بيحصل .. لو لا قدر الله السؤال طلع إنه القشة اللي قصمت ظهر البعير .. يبقي يا ريت الموضوع يقف على الطرد بس أو عاهة مستديمة..

نصيحة: خللي الطاسة بعيد عن إيد جوزك بدل ما تلبس في دماغك

20- بالنسبة للراجل المصري فيه فجوة زمنية غير محسوبة من ساعات الخليقة إسمها صباح يوم الجمعة .. إقتراحات الفطار بره و التمشية و الشوبينج و الكلام ده تعمليه مع صاحباتك .. الفترة من ليل الخميس حتي ظهر الجمعة إعتبري الراجل فيها في رحلة روحانية تصوفية لإكتشاف الذات زي الوقوف قدام التلاجة بالظبط.

ملحوظة: الجمعة يتبدل بالأحد في بلاد المهجر عشان الستات هناك متقولش الكلام ده ميخصناش

21- رجالة الجيل ده بالذات مش حيعمروا كتير .. إلحقي أقعدي معاه و كفاية هري و طلبات عشان تطولي عمره الإفتراضي شوية.. هوه أصلا كده كده بره الضمان.