الشاعر سعيد شحاتة يكتب على فيس بوك "مذلولة بتبيع للأذلّ".. قصيدة عن المروجين للتطبيع مع إسرائيل.. ويقول: "ناعوت..برنس..ودراع فرج لاكتع في فيلم كتيبة الإعدام..جوّانا ميت مليون حسن عزّ الرجال"

نشر الشاعر سعيد حامد شحاتة على صفحته على موقع التواصل الاجتماعي "فيس بوك" قصيدة جديدة يهاجم فيها "فاطمة ناعوت" و"منى برنس" بعد مواقفهن الأخيرة، الخاصة بالتطبيع مع إسرئيل

وكتب الشاعر سعيد شحاتة على فيس بوك 

(لها):

بنت البياعه بأرخص الأتمان

بنت الزمان الجاهل الأخرس

ما اللي اتفطم ع الجوع وع الحرمان

بيعيش حريص وان خان يكون أحرص

يا خاينه قولي لقلبك الخوّان

قلب الشرس لاجل البلد أشرس

واللي اتعجن بفراسة الجدعان

لو كان فرس يقدر يكون أفرس

واستكمل سعيد حامد شحاتة قصيدته التى نشرها على صفحته بموقع فيس بوك

"له"

طعم الخيانه أكيد على لسانك
دوق دمّهم واتوضى بدموعهم
واكسر شموعهم ربّما تقدر تقيد
لكن ما تنساش الشهيد له حقّ
وانّ اللي يوم انزقّ ع الناس انتهى أمره
لحظة ما روحك تنطفي يحمي الوطن جمره
ويعيش شهيدها زياده فوق عمره

إيه حال دموعك وانت بتطبّع
إيه ملمس الإيد وانت بتسلّم على السفّاح
هل كنت فرحان لمّا طرطش فوق تيابك دمّهم
هل كنت حاسس بالعيال فوق التُّخت
  والموت بيلعب سيجا في عنيهم

 وبيفصّل هدوم على قدّهم
هل كنت شايف مدفعيتهم بتضرب طفل ماشي معاه ورود
هل كنت سامع صوت صحابك ع الحدود
هل كنت قاري تاريخ يهود المنطقه كويس
هل قلبك ارتاح وانت بتهيّس وبتبيع للخسيس
 يا شهوة الحلم الرخيص  ...........
 صوت أرضنا عالي .................
 حقّ الشهيد جوّه القلوب غالي .................
 دمّ الشهيد مالي الطرق علامات ......................
 اعلم يا رافع راية الخواجات  .....................
  إنّ اللي شال الرايه له كرامات.................
  وانّ الوجع طارح بلح أمهات ...................
  قلب الشهيد عايش وقلبك مات .....................

****

(لها):

طعم الخيانه أكيد بتتمنّيه
وبتحلمي ف وسط الجناين بيه
دوقي دماهم يا عديمة الشوف
واتوصّي بالجهل اللي داخله عليه
............
إيه حالك سيادتِك وانتي رايحاله
هل كنتي فاكره إنّ اللي بيبيع دمنا هيلبّسوه عمّة نبي
هل كنتي حاسّه بقلب أمّ عيالها داس فوقهم سيور الدبابات
هل شفتي كراسة ولد متعاصه دمّ
هل حس قلبك بالدموع السخنه في خدود البنات
هل عرّفوكي زمان على معنى الحاجات
مثلاً قالولك حاجه عن مغزى (الشهاده- الصبر،

- أيتام الحروب

 -رِجل الضحية وهيّ بتسيب جسمه وتطير في الهوا

 -قلب اتكوى بنار النابالم

 -تاريخ نضال الشعب والناس والملايكه عشان نحرر أرضنا

 -عرضك، لحمك إذا عراه جاسوس أو مغتصب

- لون رمل سينا وهوّ بيطبطب على جتت الولاد

 -صوت الصراخ الله أكبر

- طعم ريق العسكري الصايم

 -غناوي الجبهه

 -أحلام دفعه كامله وهمّا بيصلّوا، المسيحي لدينه والمسلم لدينه وبعدها يتوحدّوا تحت العلم ويقولوا حرّيتنا أولى بدمّنا

- إيد ربّنا والنور بيحرسهم

- أطفال دموعهم فوق كراريسهم

-معنى النشيد الصعب فوق ورق الكتاب.....)

…….

ماذا إذا والدك حبيبك مات هناك علشان تراب
علشان وطن مافيوش فلوس تكفي الجشع والذلّ
واستعباد بشر مالهومش ذنب في أي شيء غير إنّهم آدم
علشان قضيّة ناس بتستعذب تبيع أرواحها وتصون عرضها
_علشان مسيح/ مسلم / فقير عاش واتفطم على أرضها_
ماذا إذا حسيتي مرّه ببردها ف ليل احتلال
بالصرخه فوق شط الكنال
بالمدرسه ف وشّ العيال المدهوسين
ماذا إذا طفلك حبيبك مات عشان ما عَرفش يهرب م الرصاص
وعنيكي نامت بالخلاص واتأملّت
هل كانت الدبّه اللي فيكي استكملت سكتها لسفارة العدو
ماذا إذا جوزك حبيبك مات عشان شايل علم
علشان يجيب الحق من بق اللي خان
علشان ما يستسلمش للمنطق
علشان غلابه بيحلموا بالشمس وفطير العسل
علشان مثل بيقول: مانيش فاكره
علشان جميل ناكره اللي مش فاهمين
ما اعرفش مين أنتي ولا اعرف كنتي مين
لكنّي مش فاهم
لكني فاهم بس مش عارف
لكني عارف بس مش قادر أقول
لكني قادر اقول وقلبي ما خلانيش
دا لأني كنت شاويش وكنت العسكري والضحكه والرايه
ولأني كنت لبنت فلايه
ولأنّي كنت لطفل برّايه لقلم مقصوف
عايز أقول شيء لكن مكسوف
دا لأني كنت ألوف في وقت الكَرّ
كنت لوطن ضلايه وقت الحر
إيه فكرتك عن هذه الأشياء

 (الحرب

 -ضرب النار

 -هدوم العسكري

 -صوت أمّ بتودّع ضناها عشان شهيد

 -صرخة طفوله والدها سابها وراح يقف ع الجبهه بهدومه الخفاف

 -أمر المواجهه ف حرب مش مضمونه بسلاح ماركته أقدم من التماثيل في متحفنا العظيم

- خطورة الضرب م الخندق

 -رهان القائد الفاهم على روح العساكر في الطريق الصعب والسكّه الرصاص

- وزن مدفع فوق كتاف واحد جريح

-دعوات كتيره الفجر بتروح للسما من قلب مسلم أو مسيح

 -معنى إننا نهتف لها عامي وفصيح... ونقول لها تعيشي)
إيه فكرتك عنّي
غير إنّي ديب لابس حمل من وجهة النظر المريضه

إيه فكرتك عن ضحكة الأرض المهيضه ف دمّنا

غير إننا متاعيس

إيه فكرتك عن قلب هذا التيس

اللي عشقها وغنى لعنيها ورسمها شعاع أمل واتوضى بيه لصلاته واتيمم

عشق الغلابه لأرضها بيزيد

....................... رغم إنّ عفش بيوتهم اتأمم  

إيه فكرتك عن قلب متعمم بكلمة أرض مسموعه

عن راية البلد اللي راسك عمرها ما شافتها مرفوعه
إيه قول جنابِك عن ميدان رمسيس
عن ميكرباص إمبابه في الصيف القطيع
عن بهجة النيل في الربيع
إيه فكرتك عن معنى بيع الدّار لأنصار الدمار
ليه تكرهي حرّيّه الأحرار؟

إيه شكل وشّك وانتي بتبيعي
رغم إني ما اعرفكيش أساسًا بس شكلك عار
والصوره ما بتكدبش يا بنت الـ............
هل تعرفي معنى..........
هل تعرفي.........
أو... هل........

مذلوله بتبيع للأذلّ

والكلّ شايف والوطن معنى

بيعي ببلاش واستحملي اللعنه  
.........................