انت جايلى بعد غيبه
ثانيتين وبسرعه تجرى
هى دى مش تبقى عيبه
يابن قلبى وابن عمري
انت ليه دايما بتجرى
شوقى لك مش اهانه
ياللى جايلى تسد خانه
ارضِ ربك صفىي قلبك
يالى شالك ياما حجرى
انت ليه دايما بتجرى
مالحقت حتى تقول ياماما
ماتركت حتى وراك علامه
يابنى انا مش طالبه ياما
عايزه حضنك يملى صدري
انت ليه دايما بتجرى
كنت اصبر واطلب سماح
يمكن انسى منك جراح
بعدك تِلم وبيه دبحنى
قوللى حتى عندى عذرى
انت ليه دايما بتجرى
أصل بعدك سهم صابنى.
والدموع رافضاك تسبنى
حوشها دا انت جوه ننى.
مش دموع دى نار بتهرى
انت ليه دايما بتجرى
جرحى نازف وبغزاره
والكلام وياك خساره
انت قاسى وبجداره
وفى عروقك تلج يسرى
انت ليه دايما بتجرى
دانت كنت احسن ربابه
وكان كلامك كله آيه
إيه حصلك فى النوايا
انت ناوى تزيد فى قهرى
انت ليه دايما بتجرى
انت عقلك يابنى غايب
بكره تيجى وانت تايب
هوا صعب عليا اشوفك
بكره تبكى جنب قبرى
انت ليه دايما بتجرى
مش هحاول مره اعاتبك
أو هيجى يوم واحاسبك
ياللى ناسى أمر ربك .
يحكم الديان فى أمرى
انت ليه دايما بتجرى
أخبار متعلقة :