تفقد الرئيس عبد الفتاح السيسي صباح اليوم مركز عمليات التحكم والمتابعة للشبكة الوطنية للطوارئ والسلامة العامة، وناقش محافظى بورسعيد والسويس وجنوب سيناء والأقصر فى سير الأعمال، وأكد على ضرورة متابعة حركة الأسواق والتأكد من توافر كافة السلع بأسعار مناسبة مع التأكيد على التواصل المباشر مع المواطنين بما ينعكس على استقرار الأسعار.
وقال الرئيس السيسى: فى البداية أهنيكم على الشبكة، فهذه نقلة حقيقية فى قدرتنا ونحن كدولة نرى جيدا الأوضاع على الأرض وأجهزة كل محافظة، وحتى مع أجهزة الدولة بالكامل، وهذا أمر الحقيقة يدعونا للفخر.
وأضاف الرئيس السيسى، موجها حديثه لمحافظ بورسعيد عادل الغضبان، قائلا: أنا عاوز أطمن على موقف توافر السلع والخضروات عندك فى الأسواق دلوقتى ايه؟، وأنا مش بتكلم هنا بس فى الوفرة أنا بتكلم هنا فى الأسعار، إحنا بنقول للناس من حقها إنها تكسب بس أنا عاوز أقول فى ظل الظروف اللى احنا فيها نتكلم عن مكسب معقول عشان ميبقاش عبء على المواطنين فى ظل الظروف الصعبة اللى احنا موجودين فيها، ودا أمر مهم.
وقال الرئيس عبد الفتاح السيسى، إن هناك أمر مهم كمحافظة بورسعيد ومحافظات وكحكومة إننا نبقى موجودين دلوقتى بكثافة عالية جدا فى الشوارع والأسواق حتى نطمئن أن الأمور تسير بشكل جيد.
وأضاف الرئيس السيسى، خلال تفقده صباح اليوم مركز عمليات التحكم والمتابعة للشبكة الوطنية للطوارئ والسلامة العامة:" مش عارف الأزمة فى الخارج هتستمر قد إيه، وبقول الكلام ده للسادة المحافظين فى الإسماعيلية والسويس والأقصر وفى كل حتة، أنا بقول دا بظروفها فى الاتصال اللى إحنا عملناه بتجربة إننا نشوف أننا نقدر كدولة نتواصل مع بعضنا فى المراكز اللى أنشأناها فى الدولة بالكامل عشان التواصل المستمر.
وتابع الرئيس السيسى: يهمنى فى المرحلة اللى إحنا فيها نبذل جهد أكبر من كده فى السيطرة على الأسواق، احنا موجودين عشان خاطر الناس، ماشى يا عادل – في إشارة إلى محافظ بورسعيد عادل الغضبان.
وقال الرئيس عبد الفتاح السيسى: نحن نحتاج الآن أن نبقى متواجدين على الأرض بنسب كبيرة أوى.. واحنا كمسؤولين، فمشكلة المواطنين توجه لنا ونسمع منهم .. هيقولوا لمين غير لينا؟، بالتالي نبقى احنا نبضهم فى الشارع ونبقى شايفين الدنيا عاملة إزاى.
وأضاف الرئيس السيسى: بنتكلم في التواجد فى الشارع عشان ضبط الأسعار، ودى القضية اللي محتاجين نضغط فيها دلوقتى، وبقول الكلام دا لكل السادة المحافظين، أبقى أنا متواجد بالفعل فى الميادين والأسواق الرئيسية وأشوف الأسعار بكام، واحنا كدولة نتحرك عشان نعمل تعزيز للمنتجات الموجودة وطول ما فيه وفرة طول ما فيه فرصة الأسعار تبقى مظبوطة.
وتابع الرئيس السيسى: أنا لا أتحدث عن تواجد السلع سواء أساسية أو غير أساسية من عدمه، ولكن بتكلم فى التكلفة، وزى ما قلت لمحافظ بورسعيد، الأزمة الموجودة فى الخارج قد تطول وأثارها هتبقى موجودة معانا ولازم نبقى شايفين ده ونتعامل معه، مش على قد أنه توفر دلوقتى أو تظبط الأسعار دلوقتى.. عاوزين يبقى عندنا تصور توفر دلوقتى وفى الشهور القادمة وتظبط الأسعار دلوقتى والشهور القادمة لأن هذا عبء على الناس، لما المواطن تبقى جنب منه فى الشارع يقول دا شايفنى وحاسس بى، أنا بقول الكلام دا لكل الناس.
وقال الرئيس السيسى: بقول تانى كل سنة انتو طيبين جميعا وسعيد إنى بكلمكم، ونبذل مزيد من الجهود مع المواطنين.
هذا الخبر منقول من اليوم السابع