تناولت الإعلامية شريهان أبو الحسن، دراسة أجريت بمواقع التوظيف على 33 ألف موظف من الجنسين، وتكشف أن 53% من العلاقات ما بين الجنسين – أى صديق وصديقة – ناجحة، وهذا بسبب المشاركة بين عائلات الأصدقاء، كما تجمعهم تفاصيل أخرى.
أضافت شريهان أبو الحسن، فى برنامج "راجل و2 ستات" الذى تقدمه مع الفنانة هيدى كرم، والفنان أحمد صلاح حسنى، عبر قناةON، أن العلاقة تشير إلى أن لا توجد صداقة حقيقية ناجحة فى بيئة سرية، وحينما يكون هناك سرية وغموض حول العلاقة، فاعلم أن هناك شيئا خاطئا يحدث، قائلة: "لما يكون فى بيئة فيها راحة ووضوح وبعيدة عن السرية يبقى الصداقة دى هتبقى زى الفل.. يبقى متجيش تقولى أصلها صاحبتى الأنتيم".
وعلق الفنان أحمد صلاح حسنى، أن السرية فى العلاقات يشوبها بعض الأمور غير السوية، قائلا: "الراجل لو مراته مش مستريحة اعرفى أن فيه حاجة غلط علشان كده مش بيقول.. ولو الراجل عنده ثقة فى نفسه وذكى لازم يقول لمراته ويقولها جربى تقعدى معاها".
وتناولت الفنانة هيدى كرم، دراسة أجريت فى بريطانيا تكشف أن 71% من السيدات الذين تم سؤالهن عن مشكلاتهم الزوجية وفقا للدراسة، وتبين أنها بسبب "باسوورد الموبايل".
وقالت الفنانة هيدى كرم، ببرنامج "راجل و2 ستات" الذى تقدمه مع الإعلامية شريهان أبو الحسن، والفنان أحمد صلاح حسنى، إنها تحمل السيدات المسئولية الأكبر فى المشكلات الزوجية، قائلة: "بحمل الست المسئولية الأكبر عندها.. بجد الست فى أزمة مع موبايل الراجل وإنها لازم تعرف الباسوورد بتاعه وحتى لو مش شاكه فيه.. الست بتحس أن الباسوورد سر من أسوار الكون اللى لازم تبقى عارفاه".
وعلقت الإعلامية شريهان أبو الحسن، قائلة: "عموما الكود بتاع التليفون ده ياما بوظ حياة ناس"، لترد عليها هيدى كرم بالقول: "هو إحنا قبل ما يبقى فيه باسوورد للموبايل كان بيبقى فيه مشكلة"، ليعقب أحمد صلاح حسنى بقوله: "هو الراجل لو عايز يعمل حاجة غلط مش هيعملها؟.. ممكن يقولها اتفضلى الموبايل والتانى فى جيبه بيعمل بيه اللى عايزه".
وتابعت هيدى كرم: "أنا شايفة أن الست لازم تعرف جوزها معاه فلوس كام ويلا نحوش ونعمل شهادة على قدنا أو نجيب شقة وكلها حاجة مشاركة"، فقاطعها أحمد صلاح حسنى قائلا: "لا مش شرط تعرف يبقى معاه كام.. اللى أنا شايفه المفروض يبقى حاصل أن الراجل يبقى معرف الست إنها ببيتها وبعيالها يبقوا متأمنين وعندهم كل حاجة.. لكن تبقى عارفة فلوسه وداخله كام ليه؟.. كل الستات مش بياخدوا الموضوع إيجابى وفيه ستات بتطمع فى جوزها وفيه ستات مبذرة هتنزل تجيب كل حاجة".
هذا الخبر منقول من اليوم السابع