باع القبيلة بقلم عصام سامي ناجي

صحى الضمير علشان يقوم

لبس الفجر الهدوم

وأستنظره ...لكن ماجاش

لف أحلامه المصابة

بقطن أبيض

لفها كمان بشاش

قال : الحكاية ما انتهيتش

والأمل جوانا لسه ما انتهاش

شاف المدينة لبسه

فستانها الجديد

وحطة ميكب

وكأنها في حفلة زفاف

وهي عارفه إن

أيامنا اللي جايه

أكيد عجاف

حتى الشوارع

فوق شفايفها الطرية

للأسف مات الهتاف

شاف الحنين

لمم هدومه في شنطته

علشان هيمشي من هنا

وقلوبنا لسه مؤمنه

وعقولنا فاهمة القضية

فوق كتافنا

ياما شيلنا المسؤلية

ورفضنا في نهاية المطاف

إننا ناخد عطية

شاف كل حاجة للأسف متغيرة

باع القبيلة عنترة

هاجر لبره

بعد ما خد

م المطار التذكرة